1 SAMUELA 14 - PATHIAN LEKHABU IRTHIANG C.L. Bible (BSI)

Jonathana huaisenzia

¹ Sûn khat chu Saula nâipa Jonathana khan râltukfam chôitu ruathartepa kuanga khan, “Tho so varâl tianga Filistia mihai riakbuka son la va fe rei,” a tia. Khannisian Jonathana’n a pa chu inhril maka,

² Saula khan Gibea kho kôl Migron-a theipui kung hnuaia a oma; a kuang mi irzaruk vêl an oma.

³ Khante, Silo khuaa Rengpa ochai Elia nâipa Finehasa nâi Ikaboda sangpa Ahituba nâipa Ahia kha ochai songkol innghâkin a oma. Jonathana a fe ti kha mipuihai khan inhre mahaia.

⁴ Jonathana’n Filistia mihai riakbuk fena hranga rotna hrang Mikmas fena tiang khan hi tiang hi tianga lungpui irdo hi a oma; inkhat irhming chu Bozez a nia, inhnina chu Senea a ni.

⁵ Lung irdo inkhat kha chu hmâr tianga om a nia, Mikmas tiang a’rheia, a dang inkhat kha chu sim tianga om a nia, Geba tianga irhei a ni.

⁶ Jonathana khan a râltukfam chôitu ruathartepa kuang khan, “Tho sertan loi Filistia sipaihai omna son la va fe rei. Rengpa’n a ni san duai khom a ni thei; a ni sanin chu ei tôm khoma ei tam khoma a saninzôka om Rengpa ta hrangin ite tho thei loi om ma,” a tia.

⁷ Ruathartepa khan, “Ni lungrîla hong om tak ang khan tho ro, nangma lungrîl ang kha keima khom a ni,” a tia.

⁸ Jonathana khan, “A sa, an kuang va fe ei ta, Filistia-hai son ni lei hmu ri sehai.

⁹ Khanchu ei kuang, ‘Nin laia kin zuang tung mâka chu lei om roi,’ an ni ti’n chu ei omna hmuna lei om chian ei ta,

¹⁰ khannisianlân keini tiang hong roi, an ti’n chu fe ei ti, kha kha Rengpa’n ei kuta a ni ipêk hrang a nih ti irsinsiana ni a ti,” a tia.

¹¹ Khanchu an ruaiin Filistia mi râl entuhai mithmu hranga khan an var langa; Filistia-hai khan, “En roi Hebrai mihai an irbîkna khur sûng ata an hong suak ta,” an tia.

¹² Kha hnung chu Jonathana le a râltukfam chôitu ruathartepa kha an koia, “Hong roi, thil nangni kin ihril hrang a om,” an tia. Jonathana khan a râltukfam chôitu ruathartepa kuang khan, “Ni zui ro; Rengpa khan annihai so Israelhai kuta a ipêk tâk a ni,” a tia.

¹³ Khanchu Jonathana kha a kut le a ke hmangin a luia, a râltukfam chôitu khan a zuia. Jonathana khan, Filistia-hai chu a doia, an intâl rum tâka, râltukfam chôitu khom khan a hong thathai thiaia.

¹⁴ Khaang khan Jonathana le râltukfam chôitu ruathartepa le an that maton taka an kâr irhla lam chu nôl dung tuan khat sûnga zel khan mi sômhni vêl an ithathai a ni.

¹⁵ Filistia mi murdi tâng rama omhai khom an irlo a len thing sêpa; râl hrungtuhai le riakbuka omhai khom a satêrenga irlo inthinga ichiin an oma, irnêng inhnînga, chardong irkhêl tak an ituang a ni ta.

Filistia mihai inhnêna

¹⁶ Khan, Benjamina ram Gibea khuaa Saula râl hrungtuhaiin an hong thîrhaia. Filistia-hai chaninvâia intânhai kha an hmuhaia.

¹⁷ Khanchu Saula khan a kôla mipui omhai laia khan, “Atûn hin irtep unglân tu mo a om loi infel roi,” a tia. An hong irtepin chu Jonathana le a râltukfam chôitu kha om mahai ti an inhriat suaka.

¹⁸ Saula khan ochai Abija kuang khan, “Ochai songkol kha hong chôi ro,” a tia. Hi nî hin Abija’n Israelhai makunga a hong ichôi a ni.

¹⁹ Saula khan ochai le an chong lai takin Filistia mihai riakbuk tianga buaina kha ar sâng ual ual sikin, khanchu Saula khan ochai kuang khan, “Pathian chongpui zoro om thei ta ma,” a tia.

²⁰ Kha hnung chu Saula le a kôla mipui omhai murdi kha an irbûma, Filistia mihai buaia lungzîng taka an binga irdoi, khandaia irthathai doi hrangin irdoina bual panin an suak tâka.

²¹ Filistia mihai thopa anni laia an riakbuka lei fe tâk, Hebrai mi senkhathai khom kha Saula le Jonathana kuanga om Israel mihai tiang an hong kop nôka.

²² Khaang dênin Efraima tâng rama Israel mi irbîk murdihai khom khan Filistia mihai lâizâm an tho ti an len hriata, anni khom irdoina kop sain Filistia-hai an le’rzûlhaia.

²³ Bethaven khêl rakin an doihaia, khaang khan Rengpa’n Israelhai a saninzôk a ni.

An irdoi zoi le thil tung thar

²⁴ Kha ni sûn khan chu Israel mihai chu châmsôl an irveia a sân an irzala. Saula khan, “Ki râlhai chunga phuba ki lâk mâka mi tukhom a vuan hin fâk zongtu chu vânnisalin om ri se,” itia khomâk irsâmin mipuihai thu ngar tak a pêkhai sikin. Mi tûte khom kha ni sûn chu ite fâk reng zong viat mahaia.

²⁵ Mipuihai khan ram hnuai an va tunga, khuaihlutui a lei oma.

²⁶ Ram hnuai kha khuaihlutuiin a sipa, khannisian tûte’n irtem viat mahai; mipuihai khan Saula khomâksâmna kha an ichi a ni.

²⁷ Khannisianlân Jonathana khan a pa Saula’n mipuihai kha khomâk irsâmin a lei insîhai kha inhre maka; a khianghrol chôi leh khan khuaithâr kha a suna, a fâk tâka. Voikhat fâk zelin a hong har hupa.

²⁸ Khanchu mipui laia mi inkhatin a kuang khan, “Châmsôl irveiin kin isôl ok chu a ni ta, khannisianlân ni pa’n mipuihai hi, ‘a vuana fâk zongpu tak chu vânnisalin om ri se,’ tiin thu ngar tak a ni ipêk a ni,” an tia.

²⁹ Jonathana khan, “Ka pa hin kin mihai lungzîng a isakhai a ni hi te na! En ro, khuaihlutui a chînte ki hong in khoma ki hong ihar ok a nia!

³⁰ Mipuihai hin an râllâk thil an ihmu dôr a vuan hin an inuam dôr fahai sian chu Filistia mihai hi, hi nêk hin an la ithat intamhai hrang a ni,” a tia.

³¹ Hi ni sûn hin Israel mihaiin Filistia-hai an inhnêa, Mikmas-a irthokin Aijalon dênin Filistia-hai an doia, Israel mihai chu châmsôl irveiin an sôl ok tâka.

³² Khanchu mipuihai khan an râllâk thilhai kha irchu zelin an irchua, kêlbelra hai, sechal hai, sehrâtte hai an chelhaia, kha zela khan an thathaia, a hme thisen kop pumin an fâka.

³³ Khanchu, “Irngai ro, mipuihai khan, thisen kop puma fâkin Rengpa chunga thil an tho insual tâk,” tiin Saula kha an hrila. Saula khan, “Vârirlet takin thil nin thoa, atûn hin lung lianpa ki maton tiang hin zuan hlum roi,” a tia.

³⁴ Khanchu Saula ngêtin, “Mipui laia fe unglân, an kuang, ‘Mi tinin mâni sehrât le kêlbelra fa ri se, a thisen kop pumin Rengpa chunga thil an itho insual hrang ni mah’ ti roi,” a tia. Kha nî khan chu an sehrâthai an hong kaia, an that tâka.

³⁵ Saula khan, Rengpa hrang maichâm a siama, hi hi Rengpa hranga maichâm siam masa tak a ni.

³⁶ Saula khan, a mihai kuang, “Zâna Filistia-hai zu rûnhai ei ta, zîng khovâr dênin inmokhai ei ti, thatpaihai ving ei ti,” a tia. Khanchu anni khan, “A sa ni ti lam takin tho ro,” an tia. Khannisianlân ochaiin, “Pathian chongpui bak hi rei,” a tia.

³⁷ Khanchu Saula khan Pathian a chongpuia, “Filistia-hai kha zu doihai ning mo? Nin hnêtirin mo?” a tia. Khannisianlân hi nî hin Pathianin sâm maka.

³⁸ Khanchu Saula khan, mipui hruaituhai laia, “Hin hong unglân, a vuan hin i thil mo ei itho insual zongsuak ei ti.

³⁹ Israelhai saninzôk ngaitu Rengpa hringna hmangin khomâk ki’rsâm, thil sual thotu chu a ithi ngêt hrang a ni, ki nâi Jonathana khom ni sianlân,” a tia. Khannisianlân tûte’n ite hril viat mahaia.

⁴⁰ Kha hnung chu Saula khan an kuang, “Nangni chu a bingin om unglân, keima le ki nâipa Jonathana, a bingin om kin ti,” a tia. Mipuihai khan, Saula kuang, “A sa ni ti lam takin tho ro,” an tia.

⁴¹ Khanchu Saula khan Rengpa Israelhai Pathian kuang khan, “Rengpa a vuan hin itho mo ite ni ni isâm ta loi? Rengpa Israelhai Pathian hin ni sâm ro. Thil tho’nsualtu chu keima mo ki ini, Jonathana mo a ini Urim hmuna hin ni sâm ro,” a tia. Kha sâmna kha Jonathana le Saula chunga khan a chum tâka; mipuihai chu an irthianga.

⁴² Khanchu Saula khan, “Keima le ki nâipa Jonathana kâra infel ni ri se,” a tia. Khanchu Jonathana chunga khan a chum tâka.

⁴³ Kha zoiin chu Saula khan Jonathana kuang, “I zât ual mo ni itho, insîr ro,” a tia. Jonathana’n, “Ki khianghrol hmor leh a chînte khuaihlutui ki irtem a ni: hin ki om, thi hrang khom ki irhuam a ni,” a tia.

⁴⁴ Saula’n a kuang, “Nang a that noa ni’n chu Pathianin nang a ilo lam takin nang lo ri se, kha nêka intak ual khomin,” a tia.

⁴⁵ Khannisian mipuihaiin Saula kuang khan, “Israelhai laia hin saninzôkna roiinpui tak thosuaktu Jonathana chu a ithi hrang ma ni? Ni thei no ni. Rengpa irhming sâmin kin ihril a ni, a sam irmal khat khom irnênga hin chil viat no ni; a vuan hin Pathianin a ichangpui a ni,” an tia. Khaang khan mipuihaiin Jonathana chu thi loiin an inzôk a ni.

⁴⁶ Kha zoiin chu Saula’n Filistia mihai a irzûl kha a’rngama, a kîr tâka; Filistia-hai chu an omhmun panin an fe nôk ta.

Saula inlalna le a insûngkua

⁴⁷ Saula kha Israelhai chunga rêng a chang hnunga hin, hmun tina a râlhai, Moab-hai, Amon-hai, Edom mihai, Zoba rênghai, Filistia mihai kha a doia. A ithôna tiang ang khan an hnêhai thiaia.

⁴⁸ Hâitakin a doihaia, Amalek mihai khom an hnehaia, Israelhai chu a doituhai kut chung ata a isansuakhai a ni.

⁴⁹ Saula nâipasalhai chu, Jonathana, Isvia le Malkisua hai an ni. A nâinupang ulian ualnu chu Merabi a nia, nâipang ualnu chu Mikali a ni.

⁵⁰ Saula dôngma chu Ahinoami a ni, Ahimaaza nâinu a ni. A sipai ulian tak chu Abnera a ni, Saula pa nâipang Nera nâipa a ni.

⁵¹ Saula pa Kisa le Abnera pa Nera kha Abiela nâipahai an ni.

⁵² Saula dam sûng kârka chu Filistia mihai leh a satêrengin an irdoi mai ngaia, khasika khan Saula’n mi hrât le mi hâi a ihmu murdi chu, ama sipai hrangin a ilâklût ngai a ni.