1 SAMUELA 13 - PATHIAN LEKHABU IRTHIANG C.L. Bible (BSI)

Filistia mihai leh irdoina

¹ Saula chu kum sômthum mi a ni’n a hong inlala, Israelhai chunga kum hni an lala.

² Saula khan Israelhai laia mi sângthum an thanghaia; sânghnihai kha Mikmas-a le Bethel tânga ama kuang an oma, sângkhat kha Benjamina rama Gibe khuaa Jonathana kuang an oma. A danghai chu an in omna chita an fea.

³ Jonathana khan Gibe khuaa Filistia sipaihai kha a doi inhnêa, Filistia mihaiin an len hriata. Kha hnung chu Saula khan Hebrai mi murdi irdoina koi hrangin mi a tîra, an ram pumpuia khan bekul an tuma.

⁴ Israelhai murdi khan Saula kha Filistia sipaihai a doi ti le Israel mihai chu Filistia mihaiin ngam takin an ngam ti thu an len hriat tâka. Khanchu mipuihai kha Saula kuang Gilgal-a an irbukkhôm ving tâka.

⁵ Filistia mihai kha Israelhai doi hrangin an irbukkhôm zoi tâka; tâli sîngthum, sakor chung chuang mi sângruk, sipaihai chu tuikhanglian kôla chiai tamtak an nia. Anni chu Bethaven nisua tiang panga Mikmas-a khan an fea, omhmun an khuara.

⁶ Kha hnung chu anni khan ichiom tak zelin an hong doihaia, Israelhai chu an hong hmosonghaia. Israel mi senkhathai chu rôl kâra hai, khur sûnga hai, lungpui kâra hai, tuisunsua haia an irbîka;

⁷ senkhathai chu Jordan râla Gad le Gilead ram tianghai lâizâm an thoa. Saula chu Gilgal-a a la om maia, a kuanga om mipuihai kha irlo’nthing natin an chia.

⁸ Samuela’n he a ibehai ang takin sûn sari Samuela kha an nghâka, khannisianlân Samuela kha Gilgal-a khan la zuang maka. Mipuihaiin Saula kha an mâksan thiai tâka.

⁹ Khanchu Saula khan, “Hâlirvôm thilinhlan hrang le irngeina thilinhlan hranghai kha keima kuang hong chôi roi,” a tia. Khanchu hâlirvôm thil kha an inhlana.

¹⁰ Hâlirvôm thil an hlan zoiin chu Samuela kha a zuang tung tâka. Saula kha chubai va mûka lei va don hrangin a hong suaka.

¹¹ Khannisian Samuela’n, “Imo ni lei itho tâk na?” a tia. Saula khan, “Mipuihaiin an ni mâksan thiaia, nangma lak ni sûn inkung sûnga zuang suak mak chea; khabana Filistia mihai khom Mikmas-a an irchun ving tâk ti kin hriata.

¹² Khasikin, Filistia mihaiin Gilgal-a hin an ni zuang idoi hrang a ni tâka. Rengpa lungkhamna la zong ma unga, ki tia. Khasikin hâlirvôm thilinhlan chu inhlan loi thei loi ki ni,” a tia.

¹³ Samuela’n Saula kuang khan, “Ni sintho hi into sintho dân a nia, Rengpa ni Pathianin thu nang a ipêk kha ni izôm loi a ni. Ni izôm ni sianlân chu Rengpa khan Israelhai chunga nin lalna hi kumtuangin a indet hrang a ni.

¹⁴ Khannisian atûn chu nin lalna hi hek hrang a ni ta. Rengpa thupêk ni zôm no sikin, Rengpa khan ama lungrîl irput mi zong a ta, a mihai chunga hruaitu hrangin a isiam hrang a ni,” a tia.

¹⁵ Samuela chu a thoia, Gilgal ata kha a rot tâka. Mipuihaiin Saula chu a sipaihai inthêm hranga a fe kha an zuia. Gilgal ata kha Benjamina rama Gibe khuaa khan an hong fe tâka. Saula khan mipui a zuituhai kha a tephaia, irzaruk vêl an ni.

¹⁶ Saula le a nâipa Jonathana le an kôla mi omhai kha Benjamina rama Gibea khua khan an oma; khannisianlân Filistia mihai khan Mikmas-a khan omhmun an khuara.

¹⁷ Khante an râl doi pâlhai kha Filistia mihai omhmun ata kha pâl thumin an hong suaka, pâl khathai khan Sual rama Ofra tianga panin an fea;

¹⁸ pâl khathai khan Beth Horon tiang panin an fea; pâl dang nôk khan, Zeboim phâi dep le ramchâr tianga panin an fea.

¹⁹ Israelhai ram pumpuia khan thîrsu tûte om mahaia; Filistia mihai khan, “Hebrai mihai hin khandaiin mani, ufeiin mani, an irsiam duaiin chu,” an iti a ni.

²⁰ Israel mihaiin kodâl, tutho, hreipui le kôite, lângkol thîrhai a môl le incher inngaihna hrangin Filistia mihai kuang an zu ife ngai a ni.

²¹ Kha an lângkol thîr le kodâl incher inngaina man chu Sekel hmun thuma semin hmun hni a nia, hreipui le tutho incherna man chu sekel hmun thuma semin hmun khat a ni.

²² Khaang khan an irdoi nî khan Saula le Jonathana ti no chu Israel sipaihaiin tûte’n khandai le ufei nei mahaia.

²³ Filistia-hai khan sipai pâl Mikmas panna lama khan len ruang hrangin an tîrhai tâka.