1 SAMUELA 12 - PATHIAN LEKHABU IRTHIANG C.L. Bible (BSI)

Mipuihai laia Samuela thuhril

¹ Khan Samuela’n Israel mipuihai kuang, “Irngai hi roi, keima kuanga tho hranga nin inkung chu ki tho zoi tâka, nin laia roirêl hrangin rêng khom nangni kin thang pe tâka.

² Atûn chu nangni hruai hrang khom nin nei tâka, kei lak ki tarin ki samhai khom a chuak ta, nâi pâl khom nin laia hin ki neihaia, ruatharte ki ni lai ata atûn ten hin nangni ki lei ir-ôi mai tâka.

³ Tho’nchâi ki lei nei duai khomin, hi hmuna hin ki om Rengpa makunga le a inthang rêng makunga hin ni sêl roi, mi sial mani, mi sakuartung mani ki lei lâk ngai khomin, mi huangin mani, dengintheitirin mani ki om ngai mo? Ki mit inchotir hrangin tu kuanga mo fâkinrûk ki itho? mihai kuang ata minlak ki thôna a omin chu a rêngin tuam nôk ving ki ti,” a tia.

⁴ Khan mipuihaiin, “Ni huang mak che, deng khom nin thei mak che, tûte kuang ata khom ite la ngai mak che,” tiin an sâma.

⁵ Khan Samuela’n, “Rengpa le a inthang rêng hi a vuan hin ite ki tho’nchâina nei ma ung ti nin mithmua an hriatpuitu chu an ni,” a tia. Khanchu anni’n, “A ni, Rengpa chu an hriattu chu a ni,” an tia.

⁶ Samuela’n mipuihai kuang, “Mosia le Arona inthangtu le Aigupta ram ata nin irchibulhai hruaisuaktu chu Rengpa a ni.

⁷ Khasikin Rengpa makunga atûn ngîr unglân, Rengpa’n nin chunga le nin irchibulhai chunga thil a lei itho infel dang nangni sûtpui hi rong.

⁸ Aigupta rama Jakoba le a in mihai an fe lai khan, Aigupta mihaiin deng an intheihaia; nin irchibulhaiin Rengpa chu an koia, ama’n, Mosia le Arona tîrin Aigupta ram ata an hruai suaktirhaia, hi ram hi omna hrangin a pêkhaia.

⁹ Khannisianlân Rengpa an Pathian kha an irnghila, khasikin Hazor rêng Jabina, a sipai hruaitu Sisera le Filistian mihai le Moab rênghai chu an doitirhaia, nin irchibulhai chu an kuta a pêkhai tâka.

¹⁰ Khanchu Rengpa kha an koia, ‘Rengpa chu kin irheisana, Baal hai, Astarot hai kin lei biak tâk sikin kin lei itho’nsual tâk a ni; khannisian kin râlhai kut ata hi chu ni sansuak ro, nangma vai nang bê ta kin ti,’ an tia.

¹¹ Khan Rengpa’n Jerubaala hai, Bendana hai, Jeptha hai le keima a hnungkhôn taka a ni zuang tîra. Kin rêngin nin râlhai ata kha nangni kin saninzôka, lungirngam takin nin om tâka.

¹² Khannisianlân, Amon mihai rêng Nahasa chu nangni doi hrangin a hong ti nin inhriat tena chu Rengpa chu nin rêng lei ni khom sian nin hnôla, keima kuang, ‘Roi ni rêl pe hrangin rêng kin innang,’ nin tia.

¹³ Khasikin nin rêng inthang le nin izong chu en roi, Rengpa’n chu rêng nangni a isiam pe tâk a ni hi.

¹⁴ Rengpa chu nin chia, a sin nin thoa, a hê nin irngaia, Rengpa thupêk nin pêtsan noa ni’n chu, nangni le nin chunga roirêltuhai le Rengpa nin Pathian zuituhai nin ni’n chu, sa a ti.

¹⁵ Khannisianlân Rengpa he irngai loia, Rengpa thupêk nin pêtsana ni’n chu nin irchibulhaiin Rengpa kuttum an ituang angin nangni khomin tuang nin ti.

¹⁶ Khasikin nin omna hmun senga khan ngîr unglân, Rengpa’n nin mithmua thil roiinpui tak a itho hrang hi en chian roi.

¹⁷ Bu ât zoroa om mo ni mak me? khannisianlân, Rengpa kha koi ki ta, ama’n rotui le khonri inthôtir a ti. Kha tena chu rêng nin izong chungchânga hin Rengpa mithmua thil nin lei itho inchâi hmu’nfelin inhre ta nin ti,” a tia.

¹⁸ Khanchu Samuela’n Rengpa a koia, Rengpa’n kha ni khan rotui le khonri an thôtir tâka; kha tena chu mipuihaiin Rengpa le Samuela kha a sân an chi tâka.

¹⁹ Khanchu mipui murdi’n Samuela kuang khan, “Kin thi loina hrangin Rengpa ni Pathian kuang ni sinthotuhai ta hrang hin ni chongchai pe ro, hi thil saloi tak, rêng kin lei izong hi, kin sinsual danghai nêka kin insualna tak chu a ni,” an tia.

²⁰ Khan Samuela’n mipuihai kuang, “Chi no roi, hi thil saloi hi a tho chu nin lei tho tâka, khannisianlân Rengpa nin izui hi pêtsan ual no unglân, nin milung murdi’n Rengpa sin chu tho mai roi.

²¹ Ite irfêna boi le nangni sansuak thei loi hrang chu zuiin pêtsan ual no roi, khahai kha ite hmang hmunboi a ni.

²² A chonginkung dettak sika hin Rengpa’n a mihai chu masan no nia, a mi ni hrangin nangni a len sâp tâk sika hin.

²³ Kha vai kha ni loiin nin ta hranga chongchai hi mongin, Rengpa chunga hin insual ual no ning, hi nêka lampui sa dik nangni irhmu ual ki ti.

²⁴ Rengpa chu chi phot unglân, nin milung murdi’n ama sintho unglân, nin laia a sintho roiinpuihai le nin milung sûnga vong mai roi.

²⁵ Khannisianlân sual sin nin la tho maia ni’n chu, nangni le nin rênghai khom la’rhmang ving nin ti,” a tia.