1 SAMUELA 11 - PATHIAN LEKHABU IRTHIANG C.L. Bible (BSI)

Saula’n Amon mihai an hnêna thu

¹ Khan, tha khat a’rzoiin chu, Amon rêng Nahasa chu Gilead rama Jebes khopui doi hrangin a sipaihai a hruaihaia. An inhnê tâka. Jebes khuaa mihaiin Nahasa kuang, “Kin kuang thu inkungin lân, khan kêng kin roirêltu hrangin nang kin ipom hrang,” an tia.

² Nahasa khan hiang hin a sâma, “Hiang hin nin kuang thu inkung ki ti: Nin chang tianga mitru murdi kêlsua ki ta, kha kha Israelhai irhming siatna ni a ti,” a tia.

³ Khanchu Jebes khuaa hruaituhaiin, “Israel ram murdia mi kin tîr theina hrangin sûn sari ni la nghâk phot ro, kha tena khom a ni saninzôk hrang mi tûte an om noa ni’n chu, nangma kuang irpe zel ta kin ti,” an tia.

⁴ Khanchu mi an itîrhai khan, Saula omna Gebe kha an va tunga, mipui inhriatin kha thu kha an hrila; mipui vântânghai chu inring takin an chap tâka.

⁵ Khan Saula chu loi rengata sechalhai leh an hong tung chak a nia, Saula khan, “Itho sika mo hianga mipuihai hi an ichap?” a tia. Khanchu Jebes khua mihai thuhril kha an inhrila.

⁶ Kha thurchihai kha an hriat infel tena chu, Saula chunga khan Pathian irtha a satêrengin a zuang chuma, a ning a sate’n an mur pe tâka.

⁷ Khanchu sehrât bop khat a thata, a hme ar chan chita, Israel ram hmun tina a sem suak vinga; “Mi tukhom Saula le Samuela irdoina zui nuam loitu kai chu an sehrâtchal hiang hin iloh ni a ti,” tiin. Khanchu mipuihai chunga Rengpa ichiomzia a tunga, lungirrual takin an irthok suak thei tâka.

⁸ Khanchu Saula’n Bezek hmuna khan a bukkhômhaia, Israel mi chu nuai thum an nia, Juda mi chu sîngthum an ni.

⁹ Jebes rengata palai an itîrhai kuang khan, “Nin mipuihai kha hrilhai unglân, nangtûk misa a lum lai takin sansuak nih nin ti, va ti roi,” an tia. Khanchu Jebes mihaiin kha thu kha an inhriatin chu a sân an râi a fân pehai tâka.

¹⁰ Khanchu Nahasa kuang, “Nangtûk nin kuang irpe kin ta, nin nuam takin ni lo ta roi,” an tia.

¹¹ Khanchu zîng nôka chu a mihai kha pâl thumin a zêkhaia, thingchangvârro vêla hin an irdoipuihai riakbuka an va lût khumhaia, Amon mihai chu sûn misa lum dên rakin an thathaia; an ithat selhai chu an indarh chita, a bopa om rêng irhmu ta mahaia.

¹² Khanchu Israel mihaiin Samuela kuang, “Tuhai mo an ini, Saula hin ei chunga thu a inei hrang ma ni? tituhai kha? kha mihai kha hong hruai suakhai unglân, lei thatpaihai kin ti,” an tia.

¹³ Khannisianlân, Samuela’n, “A vuan sûn lele hin chu tûte that ni no ri sehai, Rengpa’n Israel a saninzôk ni sûn a ni sikin,” a tia.

¹⁴ Khanchu Samuela’n mipuihai kuang, “Tho Gilgal-a fe ei ti, khatak ata ram hi inding thar nôk tah ei ti,” a tia.

¹⁵ Kha tena chu mipui murdi Gilgal panin an fe tâka, Saula chu Rengpa makunga an rêng an inchangtir tâka. Khataka khan Rengpa makunga irngeina thilinhlanhai an pêka; khanchu kha hmuna khan Saula le Israel mi murdihaiin lômna an siam ta.