1 SAMUELA 1 - PATHIAN LEKHABU IRTHIANG C.L. Bible (BSI)

¹ Efraima tâng rama Ramathaimzofim khuaa hin Efraima nama mi inkhat ar hming Elkana a oma. Ama hi Zufa panama mi, Tohua in sûngkuaa mi Elihua nâi Jerohama nâipasal a ni.

² Elkana hin dôngma inhni a neia, Hani le Penini hai an ni. Penini hin nâi a neia, Hani hin chu nâi nei ma.

³ Elkana kha, Rama khua ata Silo khuaa, tinrêng thothei Rengpa chubai mûk hrang le irbôl hrangin a kum tin a fe ngaia. Kha khan Elia nâipasalhai ruai Hofnia le Finehasa hi Rengpa ochai hrangin an lei oma.

⁴ Elkana’n irbôlna an hlan rikipa a dôngma Penini le a nâihai murdi dongtum a siam pehai ngai.

⁵ Hani kha lungthung ok khom sianlân, Rengpa’n nâi nei thei loiin a siam sikin a dongtum inkhat vai a isiam pe ngai a ni.

⁶ Nâi a nei thei no sika a beidongna irbôktir pe ual hrangin ama irsiatpuinu Penini hin hmusitin a lei êsêl ngaia.

⁷ Khaang khan a kum tin a hong ni maia, Rengpa ina an fe rikipin Penini khan Hani kha beidong ngaisiat a irhlotir ngai a ni. Khasikin Hani chu chap chiana omin bu khom ne nuam ngai maka.

⁸ Khanchu a pasal Elkana khan a kuang, “Hani, itho mo ni chapa? Itho mo bu ni inêk loi? Itho mo beidong ngaisiata ni iom? Nâipasal sômkhat nêk khomin ni tah hrangin chu ki isa ual loi ma ni?” a ti pea.

Hani le Elia

⁹ Sûn khat chu Silo khuaa Rengpa ina bu a nêka, an nêk zoiin chu Hani kha a thoia, a bei a dong pe oka,

¹⁰ Khanchu Rengpa kuang a chongchaia, beidong takin a chapa, kha laia khan deipu Elia chu Rengpa biak in kotbâi chopui bula a toina hmun khan a toi chiana.

¹¹ Hani khan chong an kunga, “O itinrêng sin thei Rengpa ni suaknu irhnuai lam hi nin hriatin, ni ni lan hriat maia, ni’rnghil viat mak che. Ni suaknu hi nâipasal ni ni pêkin chu, kha nâi kha chu a dam sûng kârka chu ni ta hrangin ser indang bîk ki ta, a sam khom ep pe viat no ning,” a tia.

¹² Hani kha Rengpa kuang a la chong lai takin Elia khan a hmûr inchâng kha a lei sinsiaa.

¹³ Hani khan a lungrîl taka chongchai a nia; a hmûr chu an chânga, ar hâi chu inhre thei ni maka. Khasikin Elia hin zu a inrui ni le hin a iama.

¹⁴ Khan Elia hin a kuang, “I dôra sôt mo ni inrui ta hrang? Ni uain tui kha pai ta ro,” a tia.

¹⁵ Hani khan, “Ka pu inrui ma ung, nupang beidong inren om tak ki ni; uain khom, zu khom in viat ma ung. Rengpa kuang ki lungrîl ki iphorsuak kêng a ni.

¹⁶ Ni suaknu hi Beliala nâinu’n ni bê no ro. Ki lungrîla sipliam beidongna le chardongna ki insîr a ni hi,” tiin a sâma.

¹⁷ Elia khan, “Irtharngam takin fe ro, Israelhai Pathian khan ni thil ngên chu nang pe ri se,” a tia.

¹⁸ Hani khan, “Ni suaknu hin ni mit tungin om ri se,” a tia. Khanchu nupangnu chu a fe tâka, bu a nêka, beidong hmêl irput ta ma.

Samuela suakna le inhlanna thu

¹⁹ Zîng nôka chu Elkana le a in sûng mihai kha zînga an thoia. Rengpa leh an chong zoiin chu Rama khua an ina an fe nôk tâka, Elkana khan a dôngma Hani kha a’rpôlpuia; Rengpa’n Hani chongchaina chu a sâm pe tâka.

²⁰ Khanchu Hani khan nâi a vong tâka, nâipasal a neia; “Rengpaa ki izong a ni,” tiin a’rhming khom Samuela tiin a phua tâka.

²¹ Elkana le a in sûng mihaiin a kum tina Rengpa kuanga irbôlna inhlan hrang le an chonginkung thangsua hranga Silo khua an fe zoro, a hong chuk nôk tâka.

²² Khannisian hi zoro hin chu Hani chu fe sa maka. A pasal kuang khan, “Kei chu nâite hin irhnu nêk a bâng tena Rengpa ina hruai ki ta, khatak khan a dam sûng chu a iom mai ta hrang a ni,” a tia.

²³ A pasal Elkana khan a kuang, “A dik ni iti lam takin tho ro; irhnu nêk nin bângtir mân chu in sûnga om ro. Rengpa’n ni chonginkung chu nang indet pe khak ri se,” a tia. Khanchu irhnu nêk a bâng mâka chu Hani chu in sûnga a oma, a nâi kha a dona.

²⁴ Irhnu nêk a bâng tena chu baidi her sômkhat le uain ûm khat chôiin le sehrâtchal tuai inthum mi kaiin Hani khan a nâipa chu Silo khuaa Rengpa ina khan a fepui tâka; a nâi chu a la nâiinpang ok a ni.

²⁵ serâtchal tuai kha an that zoiin chu nâipangte kha Elia kuang an hruaia.

²⁶ Hani khan a kuang “O ka pu, ni’rhming inzakpumin hi hi ki hril, keima hi chu ka pu, hi hmuna hin ni kôla ngîra Rengpa kuanga chongchaitu kha ki ni;

²⁷ Hi nâipang ngên hin ki ichongchai a ni; Rengpa khan ki ingên kha a ni pêk tâka.

²⁸ Khasika khan keima khomin Rengpa kuang ki inhlan a ni, a dam sûng chu Rengpa ta hranga ser irthiang ni ta ri se,” a tia. Khanchu kha hmuna khan Rengpa chubai an mûk ta.