1 RÊNGHAI 8 - PATHIAN LEKHABU IRTHIANG C.L. Bible (BSI)

Tempil sûnga Thuthung Bôm lâklût

¹ Reng Solomona’n Israel ulianhai, nam hruaitu hai chu Davida khopui Zion ata Jerusalem a omna hmuna Thuthung Bôm chu a lâka, tempila thon hrangin a koi bukhaia.

² Israel mi murdihai chu tha sarina, Ethanim thaa kût hmang hrangin Solomona kuang an honga.

³ Israel ulianhai an hong tungin chu, ochaihaiin a bôm kha an irzôna.

⁴ Rengpa bôm hai, puan inhai, le bungrua irthianghai chu tempila an hong siaa. Ochaihai le Levi irchihaiin an irzôna.

⁵ Israel mi a kôlvêla omhaiin chu rêng Solomona hai leh Thuthung Bôm maton tiang an irkôia; belra le sehrât tep zoi loi thilinhlanin an thata.

⁶ Ochaihaiin Rengpa Bôm chu tempil sûnga an thun lûta, a omna hrang hmun irthiang tak, cherub mitha zâr hnuaia an siaa.

⁷ Cherub mitha zâr khan Bôm le a’rzônna fung kha a’rkhûa.

⁸ A’rzônna fung hmor chu hmun irthiang tak lampui irdîn taka ngîrin an lang thei, pên tiang ata chu irlang thei ma. A’rzônna funghai chu atûn ten hin a la om mai a ni.

⁹ Bôm chunga khan ite a dang om ma, Israel nâihai Aigupta ram ata an hong suak laia Horeb tânga Rengpa Thuthung irziakna lungphêk inhni Mosia isia kha a iom sa a ni.

¹⁰ Ochaihaiin hmun irthiang tak an suaksanin chu Rengpa tempil chu sûmin ar khûa,

¹¹ Sûmzîng sikin ochaihai chu sin tho thei ta mahaia, Rengpa roiinpuina khan tempil chu a sip zoi zit tâka.

¹² Solomona chu a chongchaia, “Rengpa khan a zîng irsatak kâra om ki tih ni lei tia.

¹³ Tempil roiinpui tak ni ta hrangin ki sin zoi tâka, kumtuanga ni omna hrang a ni,” a tia.

Mipuihai laia Solomona thuhril

¹⁴ Israel mipui murdi laia Solomona’n a enhaia, Pathianin satvurna pehai hrangin bor a pêkhaia.

¹⁵ Hiang hin, “Israelhai Rengpa chu inpâk roi, ama’n chu ka pa Davida kuanga a chonginkung hlo a nin chuktir pe tâk a ni.

¹⁶ Rengpa khan, ki mihai Aigupta ram rengata ki hruaisuak nî ata atûn ten hin Israel khopui kho hmun khom nin ni biakna hrang hmun tempil lan thang ma ung. Davida nangma rêk chu, ki mihai chunga roirêltu hrangin nang kin thang a ni; a iti kha” a tia.

¹⁷ Solomona’n an sîr sui irzom maia, “Ka pa Davida khan Rengpa Israelhai Pathian biakna hrang tempil sin a lei tum ngaia.

¹⁸ Khannisian, Rengpa khan ka pa Davida kuang khan, ‘Tempil ni sin pe hrangin ni tuma ni tho’n sa.

¹⁹ Khannisian, nangma’n chu tempil sin no chi ni; ni nâipa ni rîla ra khan kêng ki tempil chu a isin hrang,’ a iti a ni kha.

²⁰ “Rengpa’n a chonginkung chu an hriat maia, ka pa Davida irthûlin ki hong inlala, atûn hin Israelhai rêng ki ni tâka, Rengpa’n a lei inkung tâk angin, Israelhai Pathian chubai mûkna hrangin tempil chu ki hong isin thei a ni ta.

²¹ Thuthung Bôm, ki’rchipuihai Aigupta ram ata an hong suaka Rengpa leh an thuthung irziakna lungphêk khom tempila siain a om tâk,” a tia.

Solomona Chongchaina

²² Solomona chu mipuihai maton tiang, Rengpa maichâm kôla a ngîra, bân phar pumin,

²³ a chongchaia, “O Rengpa Israelhai Pathian, chung vânhai le, hnuai rama khom, nangma anga Pathian dang rêng om mahai. Ni mihai le nin thuthung chu nin hriat maia; a dik takin ni thupêk an zôm photin chu, ni lungkhamna nin langtir ngaia.

²⁴ Ka pa Davida kuanga ni thu’nkung hlo nin chuk tâk a ni.

²⁵ “O Rengpa Israelhai Pathian, ka pa Davida khan ni dânhai ang taka ar chihai khomin an ngîk maiin chu, ar chi laia inkhat a ni khoma, Israelhai rêngtoihmuna toi thei mai an tih ni iti khom hi a tak chang sianlân.

²⁶ Ka pa Davida ni siahlo kuanga ni inkung murdi chu, O Rengpa Israelhai Pathian a vuana ni irnghil loi ang hin hlochukna pe mai ngai roh.

²⁷ “Khannisian nang Pathian tak hin irnêng mihai laia hin om nuam ual le nang irhoitir ma ung? Irvâna lua om loi ni nia. Ki tempil sina hin om nuam theiin mo?

²⁸ O Rengpa ki Pathian, ni siahlo ki nia, a vuana nang ki izong hi nir ngai poimo pe’n lân, ni phal pe roh.

²⁹ Hi Tempil nangma biakna hranga inhlan hi, a sûn a zânin vêngin lân, hi tempila ki chongchaihai hi irngai roh.

³⁰ Ki chongchai irngaiin lân ni mihai khom hi tempila an chongchainahai chu sâmhai ro, ni omna irvân ata inhren lân, ni ngaidam roh.

³¹ “Tukhom thil saloi tho an itum, ni maichâm kôla hong lûta, a dikna thu hrila khomâk a hor sâmin chu,

³² O Rengpa irvân ata le’rngaiin lân, ni siahlohai chungchâng chu a dik takin nangin lei sâmhai ro, a siat sintu chu a insiat angin rêlin lân, a dik chu insua roh.

³³ Ni chunga an sual sika, ni mi Israelhai chu an râlhaiin an inhnêa, nangma tiang an ho’rleta, hi tempila hin an honga ngaidam an hong zongin chu,

³⁴ Irvân ata le’rngaiin lân, ni mihai sualna chu ngaidamin lân an irchihai ni ipêkhaina rama hin hruaihai nôkin lân,

³⁵ ni mihaiin thil an tho inchâia mittui angin, an sual an irleta an sual ngaidama an chongchaiin chu.

³⁶ Irvân ata le’rngaitua’n lân, rênghai sualna le Israelhai sualna ngaidamin lân, thil dik tho hrang irchutirhai roh. Khanchu, O Rengpa ni mihai omna hrang ram ni ipêka hin rua inthotirin lân.

³⁷ Hi rama hin châm a tâka, hri a lênga, chîmuhai a siata, hri a punga, an râlhaiin ni mihai an doia, inkhur khobûr a lênga an tong zoro khom,

³⁸ an chongchaina lei sâmhai ro, ni mi Israel tukhom irlet tataka irleta tempila kutphara a chongchaiin chu.

³⁹ An chongchaina chu sâmhaiin lân, ngaidamin lân, changpuihai roh. Nangma vaiin kêng mihriam ngaituana sûngrîl inhriat thei. Mi murdi an sintho lam angin rêlhaiin lân,

⁴⁰ khanchu, hi rama kin pi le pu ni ipêkhai rama hin kin dam sûngin kin ilua thei hrang, a tia.

^41-42 “Nam dang, Israel ni loi, ram hlataka omhai khomin ni roiinpuizia le sinthotheina an inhriatin, nang an biak theina hrang le, hi tempila a chongchaiin chu,

⁴³ An izong chu sâmhaiin lân, khanchu, rammuala mi murdi’n ni mi Israelhai ang dênin nang an inhriat theina hrangin. Hi tempil ki isin hi nangma chubai mûkna a nih ti an inhriat theina hrangin.

⁴⁴ Râl doi hrangin ni mihai an irsiamin chu, kho hmuna khom an chongchaia, tempil ngaisângtuhai chu donsuiin lân,

⁴⁵ an izong chu sâmhaiin lân, irvân ata ensuiin an râlhai inhnêtirhai roh.

⁴⁶ “Ni mihaiin thil an tho inchâiin chu, (tûte thil sual tho loi om mahai) ningmurin an râlhai nin hnêtira, suaka hruaiin, ram hlatak ni khomsian,

⁴⁷ ni mihai chongchaina chu sâmhaiin lân, kha an omna ram ata an sual an irleta, an insiatnahai ata thupha an hong zongin chu, O Rengpa, an chongchaina lei sâmhai roh.

⁴⁸ Kha rama an om sûngin an sual an irleta, irsîr taka an irchibulhai ram ni ipêkhai ram tiang, ni khopui irthiang tiang, nangma hranga ki isin tempil tiang irngaia an chongchaiin chu,

⁴⁹ lei irngaiin lân, ni omna vân chung sâng ata len hre maiin lân,

⁵⁰ ar ngai lei theihaiin lân, ni mihai sualna le an sin insiatnahai murdi chu ngaidamin lân, an râlhai chu milung sa irputtirhai roh.

⁵¹ Kâng irhmang thei meipui Aigupta ram ata ni ihruai suak nangma mihai an ni hi.

⁵² Itinrêng thothei Rengpa, ni mi Israelhai le an rênghai chunga za irngai theiin lân, changpui innangin nang an koi zoroa chu irngai pehaiin lân,

⁵³ Anni chu rammuala nam tinrênghai ni siahlo Mosia kin puhai Aigupta ram ata a hruai suak lai khan, ni lei insîr pehai tâk ang khan,” a tia.

Chongchai mongna tiang

⁵⁴ Khan, Solomona chu Rengpa kuang a chongchai zoiin chu bân phara a chongchaina hmun maichâm kôl ata chu a ngîra.

⁵⁵ Mipui hong uaptuhai ta hrangin Pathian kuang satvurna inring takin a zong pehaia.

⁵⁶ “A lei inkung tâk angin a mihai laia irngeina pêk theitu Rengpa chu inpâkin om ri se. A siahlo Mosia hmanga a chonginkunghai chu inhre mai a ta,

⁵⁷ kin puhai lai ata a iompuihai angin, Rengpa ei Pathian chu ei kuang om mai ri se.

⁵⁸ A thu zôm theina hrangin ni ompui sianlân, khanchu an dit lam takin lêng thei kin ti, kin puhai kuanga a thupêkhai murdi kin zôm theina hrangin.

⁵⁹ Rengpa ei Pathianin ei chongchaina murdi le ei inghi murdi inhre mai sianlân. Israel le an rênghai lunginkham sianlân, an innang murdi pe mai ri se.

⁶⁰ Khanchu, rammuala nam murdi’n Rengpa vai hi Pathian a nih ti inhrehai sian.

⁶¹ Nangni a mihaio, Rengpa ei Pathian ta hrangin iamom zoi unglân, a dân le a thupêkhai chu atûna nin izôm ang hin zôm mai ngai roi,” a tia.

Tempil inhlanna

⁶² Khan, rêng le Israel mipuihaiin Rengpa kuang hâlirvôm thil an inhlana.

⁶³ Reng Solomona’n Rengpa ta hrangin sehrâtchal sînghni le sânghni (22,000) an hlana, kêlbelra nuaikhat sînghni (1,20,000) an hlana. Khanchu rêng le Israel mipuihai khan tempil chu an inhong ta.

⁶⁴ Kha ni sûn ngêta khan Solomona tual in mikot nghâkna in, tempil kôla om khom kha an honga; hâlirvôm thilinhlanhai, bu le bâl thilinhlan hai le sa a tui chi fâkhai siamin, dâr maichâm a isiam chunga khan a keng zoi thei no sikin tual tiang khom kêlsuain an hâlirvôm a ni.

⁶⁵ Reng Solomona le Israel mipuihaiin tempila khan, kairêng kût sûn sari an hmanga. Khatak ata Israel ram hmâr tiang dep Hamath khêl ata Israel ram sim tianga Aigupta tui kôla mi murdi chu an hong irbukkhôma, mi tamtak an ni.

⁶⁶ Sûn riat nî tena chu Solomona’n mipuihai chu a tîrhai nôk ta, Rengpa khan a siahlo Davida le ar chihai chu sat a vur sikin raifân takin an chîn theia, Solomona chu an inpâk ok a ni.