1 RÊNGHAI 7 - PATHIAN LEKHABU IRTHIANG C.L. Bible (BSI)

Solomona rêng in

¹ Solomona in chu kum sômhleithuma sin zoi a ni.

² In liantak, “Lebanon ram pui in,” a iti kha a dung mûk irzakhat, a khang mûk sômringa, ar sâng lam mûk sômthumin a sina. Sidar chopui irthua thumin a phuna, sidar miliangin a hmanga, a siling khom sidar thing a ni.

³ Irthua khatna khan chopui sômkhat ringa a phuna, a rêngin chopui sômminli ringa a ni.

⁴ Tukver khom irsâng vitin irthua thumin a siama, a banghai khom sak tiang le thang tiang a rêngin a’rzomtirhai chita,

⁵ tukver le mikothai chu, irkî minliin irang chitin a siama, a mân tianga tukver irthua thum le hnung tianga tukverhai khom ar dîntirhai chita,

⁶ chopui neiin tuala irnghâkna hrang a siama, a dung mûk sômringa, a khang mûk sômthumin, doirikho pêkin a lûtna hrang leidâk a doa.

⁷ Roirêlna hrang a siam saa, rêngtoihmun ar kula, hi hi chu roirêlna hmun a ni. A hnuai le a chunghai dênin sidar thing phalin a tuamhai ving a ni.

⁸ Roirêlna inhnung tiang khan ama omna hrang, in dang a isinhai angin a sina, khan a dôngma Faroa nâinu irhmingin in dang a sin nôka.

⁹ Kha inhai murdi chu a mikothai ata enin le a lungphûm ata a milianghai dênin lung sa chi inzen a ni, lungtukna hmuna sinsiam sai, a pên le sûng tianga innâm sataka sin sai a ni.

¹⁰ A lungphûm hrangin lung sa chi, liantak taka sin mûk sôm le mûk riathaia ihmang a ni.

¹¹ A chung chu lung sa ual a rukbaka sin sai irchuanin a siama, miliang chu sidar thing a hmanga.

¹² A in tual chu ar hîlin lungin ar kula, sidar thingin a tuam irkul saa, Rengpa tempil kholâi ang dênin a irvotir a ni.

Hurama sintum

¹³ Reng Solomona’n Tura khuaa mi inkhat, Hurama chu chong an thuana. A nu chu Naftalia nama meithâi a ni.

¹⁴ A pa chu Tura khua mi thîrsu thei tak a ni. Hurama khom zoro sôttak dâr chi tinrêng suk thei mi a nia, rêng Solomona kuang a honga, a iti angin thîr tianga sin thopui hrangin sin a ithopui a ni.

Dâr chopui inhni

¹⁵ Hurama’n dâr chopui inhni, mûk sômhleiriata irsângin, ar hlûmin mûk sômhleihnia lian, tempil lûtna kôla a phuna.

¹⁶ Chopui lu taka khan dâr thîrin an chertira, a inchertir khom kha mûk ringaa irsâng a ni.

¹⁷ Chopui sîpa incher chu, thîrhrui irlim, voisaria vêlin ar khittira irvo a nia.

¹⁸ Chopui sîp irzuma khan dalim thei irlim a sinhaia.

¹⁹ Irngamna tual in chu lili pâr angin en a hoia, mûk minlia irsâng a ni.

²⁰ Chopui sîp inchor inhni, irhlûm vunga thîrhrui irlim inhli anga irvotira dalim thei irlim irza vêlin a kâi rumin a siama.

²¹ Tempil maton tianga dâr chopui inhni sim tianga irphun chu Jakin chopui a tia, hmâr tianga phun chu Boaza chopui an tia.

²² Chopui lusîp inchor chu Lili pâr anga enhoi takin chopuihai chu siam zoi a ni tâka.

Dâr tuipang

²³ Hurama’n dâra inluan tuipang lianpa’n a siama, a lâia ir-ông lian chu mûk sôma irzâ a nia, an thûk lam chu mûk ringa irsâng a ni, ar hlûm lian chu mûk sômthum vêl a ni.

²⁴ A tuipang chu a sate’n inmâi innâmin, vêlhnia irsain an mâi innâma, a tuipang leh voikhata siam irfûktir a ni.

²⁵ Tuipang chu sechal irlim sômhleihni chunga an toia, inthumin hmâr tiang an ena, inthumin sim tiang an ena, inthumin nisua tiang an ena, inthumin nitâk tiang an ena, an chunga khan tuipang chu an toia, sechalhai chu an zer tiang a’rtôntirhai chita.

²⁶ Tuipang irsa lam chu kutzapha dôra irsa a ni, khilât anga irtêkin lili pâr irmuam angin a’rmuama, tui litar sîngminli keng theina a ni.

²⁷ Hurama’n tâli irlim sômkhat a siama, irkî minli mûk minlia lianin a siama. A’rsâng lam chu mûk thum a ni.

²⁸ A banghai chu sui innâmin, kâmkei irlimhai, sechal irlimhai, cherub irlimhai a chuanga.

²⁹ A’rmantirna chung tiang le hnuai tianga kâra khan ar dîntira.

³⁰ Tâli tina khan dâr a siama, a ke inkûi thei a siama, a rêng khan a chunga tui siana hmun a siama.

³¹ A rêngin tui siana indettirna hrui dôrin a siama; tui siana chu mûk khatin an seitira, tâli chunga khan mûk khat le a chimripin ar hnuaia.

³² A ke inkûi thei chu dâr a ni; mûk khat a chimripa irhlûm a ni, a bang hnuaia om a ni.

³³ A ke inkûi thei chu sakor tâli ke anga siam a ni.

³⁴ A rênga sûnga khan irkî minli nei irzompui minlia siam a ni.

³⁵ A maton tianga bang chu mûk chimripa irsângin a oma, a danghai chu a chopui danghai leh a ir-angtira.

³⁶ A doinahai le a pum banglâi kâra khan cherub irlimhai, kâmkei irlim hai, tûm thing hai siamin, a iphâk loina hai chu kôi etotin a’rvotira.

³⁷ Hurama’n hiang hin tâli hnôl thei chu a siama, irangin an irtiat ving a ni.

³⁸ Hurama’n tuipang khôl, tâli hnôl thei chunga a siamhai vinga, mûk minlia irsâng a ni.

³⁹ Tâli hnôl thei ringahai chu tempil sim tiang a siaa, ringa dang kha hmâr tiang a siaa; tuipang chu simnisua irkia a isia a ni.

Tempil sûnga neinunhai

⁴⁰ Hurama’n tui irsilna bêlhai, tâbor le khuri a siama. Khanchu Rengpa tempil ta hrangin rêng Solomona’n a isiam murdi ar zoi tâka.

⁴¹ Dâr chopui inhni, a lu inchor khilât anga nâm, chopui lua thîrhrui inhnia irkhit.

⁴² Chopui lua dalim thei ra irzaminli, irchuan hnia inkhâia a isiam hai,

⁴³ tâli hnôl theiin sômkhat le tuipang sômkhathai,

⁴⁴ Sechal sômhleihni chunga dâra inluan tuipang hai,

⁴⁵ bêl hai, khuri hai, thîr kutnei hai chu, Rengpa tempil neinun rêng Solomona’n Hurama isiam pe murdi thîr dâr irtêka siam ving a ni.

⁴⁶ Rengin Jordan phâizôl Sukoth le Zereda kâra an chuangtira.

⁴⁷ Hi neinunhai hi a tam hrai sikin idôr vêl chia mo a inih ti chu inhriat thei ni mah.

⁴⁸ Solomona’n Rengpa bêlbûr a isiamhai chu rângachak maichâm hai, Pathian kuanga inhlan bai irthiang sinna rângachak maichâm hai,

⁴⁹ rângachak inzena siam meiser siana sômkhat, hmun irthiang tak hnuaia ar kula, ringa sim tiang, ringa hmâr tiang, pârte hai, meiser le meichep.

⁵⁰ Rângachak khilât, meiser infâina hai, mirimhoi hâlna kok hai, mei siana hai chu rângachakin a siamhaia. Tempil hmun irthiang tak le a danghai tentanin inkhâr le a kôl vêlhai rângachaka siam a ni.

⁵¹ Reng Solomona’n Rengpa tempil a sin zoiin chu a pa Davida’n a lei iser ngai hai, sumru hai, rângachak hai, bêlbûr hai, chu tempil sum sianaa khan a hrêhai ta.