1 RÊNGHAI 3 - PATHIAN LEKHABU IRTHIANG C.L. Bible (BSI)

Vârna zongin Solomona a chongchai

¹ Solomona chu Aigupta rêng Faroa le irkaipui a nâinu dôngma’n a neia; rêng inhai, Tempil le Jerusalem khua kul banghai a sin zoi mâka chu a dôngma chu Davida khopuia a sia maia.

² Mihai chu hmun irsânghaia an irbôl ngaia, Rengpa tempil sin a la ni no sikin.

³ Solomona chu Rengpa lung a thunga, a pa Davida irchutirnahai zômin; khannisian, hmun irsânga thil inhlanin mirimhoihai hâlin a oma.

⁴ Reng chu thilinhlan hrangin Gibeona a fea, kha hmun kha thilinhlanna hmun roiinpui tak a ni. Solomona’n kha maichâma khan hâlirvôm thil inhlanna’n thil hring sângkhat a lei inhlan tâka.

⁵ Gibeona’n Solomona irmanga Rengpa a inlâr pea, Pathianin “Ni inuam murdi zong ro, nang pe ki ti,” a tia.

⁶ Solomona’n, “Ni siahlo Davida, ka pa chu nangma hrangin iamom takin a oma, dik tak le lungrîl fel le irthiang takin a om sikin, ni’rngaiinnata, a chunga ni khonzâna irsâng tak pêkin atûn hin rêngtoihmuna toi hrangin a nâipa ni pêka.

⁷ Atûn hin, o Rengpa ki Pathian, ni siahlo hi ka pa Davida irthûlin nin laltira, kei lak nâipang ki nia, ki tho hrang tum khom inhre zoi loiin ki oma.

⁸ Ni siahlo hi ni ni inthang, mi idôr vêlpa mo an ini inhre zoi loi chunga ni nin laltira.

⁹ Thudik le dik loihai theithâka fel taka roi ki rêl theina hrangin ni siahlo hi vârna pe ro. khano’nchu, mi hi dôra tamhai laia hin roirêl thei no ning,” a tia.

¹⁰ Solomona vârna zong sikin Rengpa chu a sate’n a chunga a lôm tâka,

¹¹ khanchu Pathianin a kuang khan, “Dam sôtna hai, irchongna hai, ni râlhai thi theina zong loiin, dik taka roirêl theina ni zong sikin,

¹² ni izong chu nang pe ki ti, mi tûte la inei ngai loi le inhnunga mi inei thei loi hrang vârna le roirêl theina nang pe ki ti.

¹³ Ni izong loi irchongna hai le irhming satna hai khom nang pe sa ki ti, ni dam sûngin rêng tukhomin nang a phâk om ngai no nihai.

¹⁴ Ni pa Davida anga ki lampui ni hroa, ki thu’nkung le ki thupêkhai ni zômin chu zoro sôttak nan damtir ki ti,” a tia.

¹⁵ Solomona chu a hong hara, a’rmang tiang Pathianin thu a ihril pe a nih ti an hriat tâka, Jerusalem tiang a honga, Rengpa Thuthung Bôm kôla a ngîra, hâlirvôm thilinhlan le irngeina thilinhlanin, a siahlo murdihai fâk hrangin hruai an thea.

Solomona’n thubuai intak a rêl infelna

¹⁶ Sûn khat chu notizuar inhni rêng kuang an honga; a kôla an ngîra.

¹⁷ Inkhat nu khan, “Ka pu hi nupangnu leh hin in sûngkhata om ngai kin nia; hmun khata kin om laiin, nâi ki neia.

¹⁸ Nâi ki nei nî ata sun thum zoia, hi nupang khom hin nâi a neia, kha ina khan tûte mi dang om mahaia, kin ruai vaia om kin nia.

¹⁹ Zâna a inkâr, hi nupangnu hin a nâi chu a del thata.

²⁰ Zânlaia a thoia, ni siahlo hi a poma, a nâipa thi sai kha a nin pomtir a ni:

²¹ Zînga irhnu pe hrangin ki thoiin chu, nâite kha thi saiin ki hmua, ki en infel sabakin chu ki nâipa, ki inei kha ni ta maka,” a tia.

²² Inkhatnu khan, “Ni mah a dampu kêng hi ki nâipa a ini, a thi hi kêng nangma nâi a ini” a tia. Maton uala nu khan, “Ni ma, a thi kêng hi nangma nâi a ini, a dampu kêng hi keima nâi a ini,” a ti ngit tâka. Khaang khan rêng kôla an irsêla.

²³ Khanchu rêng Solomona’n, “Nin ruaiin, a hring hi ki nâipa a nia, a thi hi kêng ni nâipa nin irtia,” a tia.

²⁴ Khandai ni hong pe roi, a tia, khanchu an hong chôi tâka.

²⁵ Khandai chu an hong pêka, rêng khan, “Nâite a la dam kha bong hniin sât nghet unglân, bong kha khatin semhai roi,” a tia.

²⁶ Nâipang a la dam nutak khan chu, a nâi kha lung a thung hrai sikin rêng kuang khan, “Ka pu, lungkham takin nâite chu hi nu hi pe chian ro: that no ro,” a tia. Inkhatnu khan chu, “Bonghni inchangtirin lân, tûte’n kin dong no khoma,” a tia.

²⁷ Reng khan, “Hiang hin irngeina a siama, nâitesen dam chu nu a matona thuhrilnu hi pe unglân, that no roi, hi kêng hi a nutak a ini,” a tia.

²⁸ Israel mi murdi’n rêng thurêl kha an inhriatin chu a sân an inzâ ual uala, Pathianin roirêl theina dik tak a pêk ti an inhriat suak a ni.