1 RÊNGHAI 22 - PATHIAN LEKHABU IRTHIANG C.L. Bible (BSI)

Deipu Mika’n Ahaba a irchu

¹ Kum thum sûng chu Suriahai le Israelhai irdoi loiin an oma.

² Kum thum changna tena chu Judahai rêng Jehosafata’n Israel rêng Ahaba kuang a zu fea.

³ Israelhai rêng khan a ulianhai makunga, “Gilead rama Ramot khua hi kin ta a nia, itina mo Suria rêng kuang ata kin ilâk kîr loi?” a tia.

⁴ Jehosafata kuang khan, “Ramot khua hi ni doipui theiin mo?” a tia. Jehosafata’n Israel rêng kuang khan, “Nangma ni nuam ni tak ti ro, ki sipaihai leh nang doipui hrangin kin irsiam.

⁵ Khannisianlân, Rengpa thu la hei irngai phot bak ei ti,” a tia.

⁶ Ahaba’n deipu irzaminli vêl a koibukhaia, “Ramot khua mo hong doi ning?” tiin ar donhaia. Anni khomin, “Doi roh Rengpa’n nan hnêtir a ti,” an tia.

⁷ Jehosafata’n, “Deipu dang, Rengpa ni zong pe hrang an iom mo ni ma?” a tia.

⁸ Israel rêngin Jehosafata kuang khan, “Imla nâipa Mika a om. Ama hin ite thil sa ni zong pe thei ngai ma, en nuam ma ung. Thil saloi kêng i zât ma ni a ihrilsuak rêk hrang,” a tia.

⁹ Khanchu rêngin hruaitu inkhat a koia, Mika hruai hrangin a tîra.

¹⁰ Rêng inhni chu Samari khopui lamsua pêna hruia rêngtoihmun an isiama khan an toia, deipuhaiin an vêlhaia, thu an hrilpuihaia.

¹¹ Anni laia inkhat Kenaana nâipa Zedekia’n, thîrsum seki illim a siama, Ahaba kuang, “Rengpa’n hiang hin a ti, Suriahai chu hi leh hin doihai ei ta, inhnê paihai ei ti,” a tia.

¹² Deipu danghai khomin khaang khan an tia, “Fe’n lân Ramot khua chu hong doi ro, inhnê ngêt ni ti, Rengpa’n nan hnêtir ngêt a ti,” an tia.

¹³ Mikaia hruaitu hranga an iti kuang khan, “Deipu dang murdi’n a sa lam takin rêng kuang an puanga, nang khomin khaang khan ti pe ro,” a tia.

¹⁴ Khan Mikaia khan, “Rengpa mihriam hring irhming a hong kîr khan, Rengpa’n hril hrang a nih iti vai kêng ki ihril hrang,” a tia.

¹⁵ Rêng Ahaba kuang a va tungin chu rêngin, “Mikaia, Gilead rama Ramot khua hi ki idoi hrang mo doi loi hrang?” a tia. Mikaia khan, “Hong doi ngân roi ba, inhnê ni ti, Rengpa’n nang ni inhnêtir ri se ba,” a tia.

¹⁶ Khan Ahaba’n, “Rengpa irhmingin ki kuang thu ni hrilin thudik vai ni hril ro, voi iza mo nang ki iti hrang?” a tia.

¹⁷ Mikaia khan, “Hruaitu nei loi belra angin Israelhai chu tânga an irthekindarh rumin ki hmua, Rengpa’n hiang hin a ti, hi mihai hin hruaitu nei mahai, irtharngam takin an in lam tiang fe ta ri sehai a ti,” a tia.

¹⁸ Ahaba’n Jehosafata kuang, “Irngai ta ro, ki kuang keima hrangin ite thil sa hril ngai ma, nang ki iti pe kha, thil saloi lam vai kêng a ihril ngai,” a tia.

¹⁹ Mikaia’n a hril maia, “Rengpa thu hi irngai sabak ro, irvâna rêngtoihmuna Rengpa toi lai ki hmua; vântîrtônhaiin an irhuala.

²⁰ ‘Tu mo Ahaba kuang zu fe hrang, Ramot doia thi hranga zu huang thei hrang?’ Rengpa’n a ti. Vântîrtôn senkhatin kha thu kha an hrila, a danghaiin thu dang an hrila.

²¹ Irtha inkhat hi a zuanga, Rengpa makunga a va ngîra, ‘Zu huang ki ti,’ a tia.

²² Rengpa’n, “Itin mo ni ihuang hrang,?” a tia. Irtha khan, “Zu fe ki ta, Ahaba deipuhai laia minlak tho pehai ki ti,” a tia. Rengpa’n “Fe’n lân, zu huanghai ro, hlo hong chuk ni ti,” a tia.

²³ Mikaia’n, “Khaang khan a ni, Rengpa’n hi deipuhai hi ni makunga minlak a inthotir ngai a ni, Rengpa zelin ni siatna hrang thu a lei inkung a ni,” a tia.

²⁴ Deipu Zedekia’n Mikaia chu a pana, a mikuar kôla, “Itiklai khan mo Rengpa irtha’n a ni imâksana, nangma kuang thu a ihril tâk?” a tia.

²⁵ Mikaia’n hiang hin a sâma, “Ni ikil sûnga nir bîk tena inhria ni ti,” a tia.

²⁶ Ahaba’n hruaitu inkhat kuang, “Mikaia kha chelin lân, khua optu Amon kuang hruaiin lân, rêng nâipa Joasa khom irhmutir sa roh.

²⁷ Zâm zâma ki hong kîr nôk mâka chu lei khum unglân, bai le tui vai lei pe ri sehai,” a tia.

²⁸ Mikaia’n, “A hring a dama ni hongin chu Rengpa inhre ri sehai,” a tia.

Ahaba thina thu

²⁹ Rêng Ahaba le rêng Jehosafata chu Gilead biala Ramot khua doi hrangin an suak tâka.

³⁰ Ahaba’n Jehosafata kuang, “Ei irdoi tika chu ki’rvôna indanglamtir ki ta, nang chu ni rêng tukfam leh irvo mai ro” a tia. Rêng Ahaba chu irvo danglamin a’rvoa, irdoina buala a kop sa tâka.

³¹ Suria rêngin tâli chalaitu hruaitu sômthum inhnihai chu, “Israel rêng ti no chu tûte a dang ir-otpuihai no roi,” a tia.

³² Khahai khan Jehosafata an hmu’n chu Israel rêng sônin an doi tâka. Jehosafata chu a khêka,

³³ Tâli chalaitu hruaitu khan Israel rêng ni mah ti an hriatin chu, irzûl nuam ta maka.

³⁴ Suria sipai thal kâphai hin rêng Ahaba chu a râlthuam irbel kâra khan a kâpa, a tâli chalaitu kuang khan, “Sâbe ki tuang ta hi te, kîrin lân, irdoina hmuna intân ta ro,” a tia.

³⁵ An irdoi lai takin Ahaba chu a tâli bang irhnêlin, Suria mihai thîrin ar tunga, thisen chu a tâli chunga irting hlukin a suaka, khohloi tiang chu a thi tâka.

³⁶ Misa tâk tôna chu Israel sipaihai kuang thu a zuang tung nôka, “Mi murdi mâni khua chita kîr nôk hrang,” an tia.

³⁷ Reng Ahaba chu a thi tâka, a ruak chu Samari khuaa an fepuia, an phûm ta.

³⁸ A tâli chu notizuarhai tui irsilna ngai Samari dîla an irsûk infâia; uihaiin a thisen chu an inliaka, Rengpa ihril angin a ituang ta a ni.

³⁹ Reng Ahaba sintho danghai, a rêng in irvotir dânhai, khopui a irvotir dânhai chu Israel rênghai thurchi irziakna lekhabua a chuang.

⁴⁰ A thi zoiin chu a nâipa Ahazia chu ama irthûlin an lal nôk tâka.

Juda rêng Jehosafata

⁴¹ Israel rêng Ahaba rêng kum minlina, Asa nâipa Jehosafata chu Judai rama an lala,

⁴² Jehosafata inlal ar phutin kum sômthum ringa mi a ni. Jerusalema kum sômhni ringa ten roi a rêla, a nu chu Azubi Silhia nâinu a ni.

⁴³ A pa angin Pathian mithmua sin sa a thoa. Millim biakna hmun irsâng chu insiat ual maka; khasikin mipuihai chu kha hmun irsânga khan an la irbôl mai ngaia, mirimhoihai an la ihâl ngai a ni.

⁴⁴ Jehosafata chu Israel rêng leh an irngeia.

⁴⁵ Jehosafata sintho danghai, irdoina hmuna a ihâi dânhai, chu Juda rênghai lekhabu irziakna bua a chuang.

⁴⁶ A pa Asa dam laia pasal le nupang millim biakna hmuna irzuar ngai chu a khap vinga.

⁴⁷ Edom ramin rêng nei mahaia. Juda rêngin a’rthûl a siaa.

⁴⁸ Ofir rângachak pêl hrangin rêng Jehosafata’n irkuang a siamhaia; khannisian, Ezion-geber a siat tâk sikin inzin thei ta mahai.

⁴⁹ Israel rêng Ahazia’n a mihai chu Jehosafata mihai leh inzin suam ri sehai a tia; khannisian Jehosafata’n nuam maka.

⁵⁰ Jehosafata chu a thi tâka, Davida khopuia rênghai thâna an phûma. A nâipa Jehorama chu ama irthûlin an lal nôk ta.

Israel rêng Ahazia

⁵¹ Judahai rêng Jehosafata inlal kum sômhleisarinaa chu Ahaba nâipa Ahazia chu Israelhai chunga roirêl hrangin Samari khuaa an lala, kum hni sûng roi a rêla.

⁵² RENGPA nuam loi lam thil a tho insuala, a pa Ahaba, a nu Jezebeli rêng Jeroboama hai angin thilsual a thoa, Israelhai hruai sualtu a ni.

⁵³ A pu ang ngêtin Baal pathian sin a tho sikin Israelhai Pathian RENGPA chu a ning an murtir pea.