1 RÊNGHAI 21 - PATHIAN LEKHABU IRTHIANG C.L. Bible (BSI)

Nabota grep irhuan

¹ Jereel khuaa Samari rêng Ahaba in kôla khan Jezreel mi Nabota an iti khan grep irhuan a neia.

² Ahaba khan Nabota kuang, “Ni grep irhuan hi ansuangrua songna hrangin ni pe roh. Hi nêka sa grep irhuan nang pe ki ti, ni nuam paiin chu sum khom a’rphu lam tôkin nang pe sa ki ti,” a tia.

³ Nabota’n Ahaba kuang, “Kin puhai hun lai ata kin irchon a ni sikin, hianga nangma nang pêk hi chu Rengpa irngai khom hoi no ni,” a tia.

⁴ Jezreel mi Nabota’n, kin puhai irhuan irchon nang pe thei no ning a ti sikin ningmur puma nuarin a in tiang Ahaba chu a rota. Bang tianga irheiin a zâlhmuna a zâla bu khom ne nuam ta maka.

⁵ A dôngma Jezebeli a va fea a kuang khan, “Ithoa mo ni ngûirula bu ni inêk nuam loi?” a tia.

⁶ Ama khan, “Jezreel mi Nabota’n a grep irhuan nir chotir ro ki tia, ni nuam paiin chu hi nêka sa grep irhuan dang nang pe ki ti,” ki tia. Ama’n, “Ki grep irhuan dang nang pe thei no ning tiin a ni sâm sika a ni hi te,” a tia.

⁷ Khan a dôngma Jezebeli’n, “Thoiin lân, raifân takin bu ne ro, Jezreel mi Nabota grep irhuan ni lâk thei hrang dân nang ngaitua pe ki ti,” a tia.

⁸ Khanchu, Ahaba irhmingin lekha a’rziaka, irsinsiana an danga, Nabota omna khuaa ulian roirêltuhai a thona.

⁹ Hiang hin a’rziaka, “Bu nghei hrangin inpuang unglân, mipui koibûmin Nabota kha mipuihai makunga intoitir unglân,

¹⁰ mi sual inhni ama sêl hrangin a maton tiang inlôitirhai unglân, ‘Pathian le rêng nin sîrinsiat a ni,’ tiin sêlhai sian kho sûng ata hruaisuak unglân, dêng that roi,” tiin.

¹¹ Khanchu, Nabota omna khuaa ulianhai le roirêltuhaiin Jezebeli’n a iti lam angin an thoa.

¹² Bu nghei ni sûn an inpuanga, mipui an bukhaia, Nabota chu a laia an intoitira.

¹³ Mi sual inhni hin “Pathian le rêng an sîrinsiat a ni,” tiin an sêla. Nabota chu kho sûng ata an hruaisuaka, an dêng that ta.

¹⁴ Khanchu Jezebeli kuang khan, “Nabota chu a thi ta,” tiin an hrila.

¹⁵ Jezebeli’n Nabota an dêng that tah ti an hriatin chu, Ahaba kuang khan, “Thoiin lân Jezreel mi Nabota grep irhuan nang irchotir nuam loi kha, va nei ta ro, ama chu a thi ta,” a tia.

¹⁶ Khan Ahaba’n Nabota a thi tah ti an hriata a grep irhuan lua hrangin a suak tâka.

¹⁷ Rengpa thu chu Tisbe mi Elija kuang a zuang tunga.

¹⁸ “Thoiin lân, Samari khuaa om Israel rêng Ahaba irhmupui hrangin fe roh. Atûna Nabota grep irhuan lua tumin kha khan a om.

¹⁹ A kuang Rengpa’n hiang hin a ti, Nabota thatpai a ruk ti loia, a grep irhuan khom lua ni itum ma ni? va ti ro, Rengpa’n hiang hin a ti. Uihain Nabota thisen an inliakna hmun ngêta hin ni thisen inliak an ti,” a tia.

²⁰ Khan Ahaba’n Elija kuang khan, “A ni inhriatsuak a ni ta hi te ki râlpa’n?” a tia. Elija’n, “O nang kin hriat ta, Rengpa mithmua thil dikloi tho hranga irzuartu.

²¹ Ni chunga siatna zuan tungtir ki ti. Nin in sûngkuaa patung nâi murdi chu nâipang le tar khom, nangma le nin rêngin nangni inhekpai ving ki ti.

²² Ni in mihai chu Nabota nâipa Jeroboama in mihai ang le Ahija nâipa rêng Baasa in mihai angin nangni soisak ki ti; ki ning nin murtira Israelhai ni hruai insualhai tâk sikin.

²³ Rengpa’n Jezebeli chungchâng khom hiang hin a ti. Jezreel khopuia uihaiin a hme la fa an ti. Ahaba in mihai laia khopui sûnga thi murdi uiin fahai an ti.

²⁴ Ram hnuaia thi murdi chunglêng vahaiin fahai an ti,” a tia.

²⁵ A dôngma Jezebeli’n thil saloi hrila Rengpa mithmua thil saloi tho hranga irpêk, Ahaba ang hi tûte om mahai.

²⁶ Israelhai kuanga, Rengpa inhnotsuak Amor-hai angin Ahaba hin millim a biaka, thil intirom takhai a tho ngai.

²⁷ Elija’n kha thu a hril zoiin chu Ahaba khan a puansil an potthêra, bora puan a sila, bu a ngheia, bora puan leh a zâla, ngûi takin a om tâka.

²⁸ Rengpa thu chu Tisbe mi Elija kuang a zuang tunga,

²⁹ “Ahaba ki makunga a’rngaiintômzia hi nin hriat mo? hianga irngaiintôm sikin a dam sûng chu a chunga siatna intungtir pe no ning, a nâipa zoro sûnga a in mihai siatna intungtir ki ti,” a tia.