1 RÊNGHAI 17 - PATHIAN LEKHABU IRTHIANG C.L. Bible (BSI)

Elija’n khosâl hrang a lei hril

¹ Gilead rama Tisbe mi Elija’n Ahaba kuang khan, “Rengpa Israelhai Pathian a sin ki itho pe ngai irhmingin nangni kin hril, kum hni kum thum sûng chu keima ircham ni loiin irnêng chunga hin irdo le rua ite tho viat no ni,” a tia.

² Rengpa thu chu Elija kuang a zuang tunga.

³ “Hi hmun ata hi suakin lân, nisua tiang fe’n lân, Jordan nisua tiang Kerit tui kôla irbi roh.

⁴ Vadunga tui chu tûng thei ni ti, nang an fâ hrangin vaâkhai thu ki pêkhai ta,” a tia.

⁵ Rengpa iti angin a thoa, Jordan nisua tiang Kerit tui chu a pana a om tâka.

⁶ Zîng le khohloia vaâkhaiin bai le hme an hong pêk ngaia, vadunga tuihai inin a oma.

⁷ Kha rama khan rua a tho ta no sikin vadung tui khom a kang zoi tâka.

Elija le Zarefat meithâi

⁸ Khan, Rengpa’n Elija kuang,

⁹ “Thoiin lân Sidon biala Zarefat khuaa fe’n lân, kha khan om ro, nang an fa hrangin meithâi inkhat nang kin thang pe ta,” a tia.

¹⁰ Zarefat khuaa khan a fe tâka; kha kul mikot a va tungin chu, meithâi inkhat hin thing a lei tana, kha meithâinu kha a hon sama, “Tui chînte nin sua pein lân lei in rong,” a tia.

¹¹ Pe hrangin a hei fein chu, “Lungkham takin bai chînte ni hong chôi pe sa ro,” a ti nôka.

¹² Meithâinu khan, “Rengpa ni Pathian hring irhmingin nang kin hril, bai chu nei ma ung, bêla baidi kut kângkhat le sahriak a chînte vai ki nei. ki nâipa leh kin fâk hrang sin siamna hrangin thingchâr ki’rfuanga, kha kin ineite kha kin fâk zoiin chu phîngchâmin la thi ta ro ung,” a tia.

¹³ Elija’n, “Ni charindong no ro, inhongin lân, nin fâk hrang chu va siam roh. Khannisianlân, bai a chînte a ni khomin ni siam pe bakin lân, ni hong pe ro, a dang chu ni nâipa leh la fa ta roi,” a tia.

¹⁴ Rengpa Israelhai Pathianin hiang hin a ti; “Rua kin thotir mâka chu baidi omna hmun chu rong no nia, sahriak bûr khom châr no nih a iti kêng,” a tia.

¹⁵ Meithâinu chu a fea, Elija ihril angin a va tho pea, khanchu an rênga fâk hrang sûn tamtaka hrangin a lei om pea,

¹⁶ Rengpa’n Elija kuanga a iti angin baidi siana bêl chu rong maka, sahriak bûr khom châr maka.

¹⁷ Kha hnung chu meithâinu nâipa dam maka, a na an rik pe sisita, a thipui tâka.

¹⁸ Meithâinu khan Elija kuang khan, “Pathian mi, itho mo hianga ni ni ilo? Pathian kuang ki sualna târinlang hrang le ki nâipa that hranga ni ihong kêng a ni hi te,” a tia.

¹⁹ Elija’n, “Ni nâipa chu ni hong pe hi ro,” a tia, a nu ipominkua chu a hruaia, a omna hmuna pomin a lûtpuia, a zâlhmuna an zâltira.

²⁰ Khanchu inring takin a chongchaia, “O Rengpa, ki Pathian, itho mo hi thil saloitak hi, hi meithâi chunga ni intungtir pe? hi nu hi phûkdâi taka ni donsuitu a nia, itho mo hianga a nâipa ni ithat pe?” a tia.

²¹ Khanchu nâipang chunga khan voithum an boka, a chongchaia, “O Rengpa ki Pathian, hi nâipang hi indam nôk ro,” a tia.

²² Rengpa khan Elija chongchaina chu a sâma nâipang chu a hong har suaka, a dam nôk ta.

²³ Elija khan nâipang kha a nu kuang a fepui nôka, a kuang khan, “Hi ni nâipa chu a dam nôk ta,” a tia.

²⁴ Meithâinu khan, “Pathian mi ni nia, Rengpa hin ni kuanga thu an sîrin, nang a sâm ngai a nih ti atûn hin kin hriat infel suak ta,” a tia.