1 RÊNGHAI 16 - PATHIAN LEKHABU IRTHIANG C.L. Bible (BSI)

¹ Baasa chungchâng, deipu Jehua, Hanania nâipa kuang, hiang hin Rengpa thu a zuang tung.

² “Ite bêa ibe ngai loi chu, Israelhai roirêltu hrangin nang kin thang. Atûn hin Jeroboama angin thil saloi tho’n ki mi Israelhai hruai suala, an sualna’n ki ning an inmurtir ta a ni.

³ Khasikin, Nahata nâipa Jeroboama in sûng mihai laia ki itho angin, ni in mi murdi nangni inboipai ving ki ti.

⁴ Nin in mi khopui sûnga thi chu uihaiin fahai an ta, ramkâra thi chu chunglêng vahaiin irsemdarh an ti,” a tia.

⁵ Baasa thurchi dang, a sin thôna le a hâi lamhai chu Israelhai thurchi irziakna lekhabua a chuang.

⁶ Baasa chu a thia, Tirza khuaa an phûma, a nâipa Ela chu ama irthûlin an lal ta.

⁷ Baasa le a in mihaiin, Rengpa mithmua thil saloi an tho hrai sikin Hamania nâipa deipu Jehua kuang Rengpa thu a zuang tunga. Reng Jeroboama anga thilsual a tho sikin le Jeroboama in mihai a thathai sikin Rengpa’n a chunga a ning an mur pe ok a ni.

Israel rêng Ela

⁸ Juda rêng Asa kum sômhni kiruk an lal tena chu Baasa nâipa Ela chu Israel rama an lal nôka. Tirza khuaa kum hni an lala.

⁹ A rualhai laia mi inkhat Zimria, a tâli hmang laia hruaitu hranga a isia pa chu tehel a zong pea, kha laia khan Ela chu Tirza khuaa om a nia. Reng in enkoltu Arza ina zu a len rui pea.

¹⁰ Zimria chu in sûnga a va lûta Ela chu a thata, ama irthûlin an lala. Kha thu kha Juda rêng Asa inlal kum sômhni sarina kuma a ni.

¹¹ Zimria khan rêngtoihmun a luaa, a pa Baasa in mihai a thathai nôk vinga, pasal a urêng sûngsuak tûte hôi nei viat loiin,

¹² Baasa chungchânga deipu Jehua kuang Rengpa thu zuang tung khan, Zimria khan Baasa in mihai a thathai zoia.

¹³ Millim pathian an biaka, Israelhai an hruai insual sikin Baasa le a nâipa Ela khan Rengpa Israelhai Pathian ning an inmurtir sika a ni.

¹⁴ Ela sintho murdi chu Israel rênghai thurchi irziakna lekhabua a chuang.

Israel le Zimria

¹⁵ Judahai rêng Asa kum sômhni kum sari an lal kumin, Zimria chu Tirza khuaa sûn sari Israelhai chunga an lala, Israel sipaihaiin Filistia khuaa Gibethon chu an irhuala.

¹⁶ Zimria khan rêng chu a khit phiara, a thatpai ti an inhriatin chu, an khua irhualtuhai khan, an riakhmun zela khan an hruaitupa Omria chu Israel rêng an inchangtir zela.

¹⁷ Omria le a kôla mi om murdihai khan Gibethon chu an rotsan tâka, Tirza khua an hong irhual nôk a ni.

¹⁸ Khua kha an hong rûn ti Zimria’n an hriatin chu, rêng in sûng rîla an tân lûta, irkalkhum pumin a ikâng that a ni.

¹⁹ Rengpa mithmuin thil a tho insual sikin, Jeroboama lampui a hroa, Israelhai hruai sualna sikin thil chu a chunga a itung a ni ta.

²⁰ Zimria thurchi dang, ikhit phiar a tuangnahai thurchi chu Israel rênghai thurchi irziakna lekhabua a chuang.

Israel rêng Omria

²¹ Israel mipuihai chu pôl hniin an irsema, a chimriphaiin Ginata nâipa Tibnia chu rêng inchang nuam pôl an oma, a chimripin Omria zui pôl an om nôka.

²² Omria zuituhaiin Ginata nâipa Tibnia zuituhai chu an inhnêhaia. Tibnia chu a thia, Omria a hong inlal tâka.

²³ Judahai rêng Asa inlal kum sôm thum inkhatna kumin Omria chu a hong inlal phuta, kum sômhleihni an lala, a maton tianga kum ruk sûng chu Tirza khua a opa.

²⁴ Semera kuang ata Samari tânga sumru sângruk leh a’rchôka, kha hmuna khan khopui an dinga, kul a siama, kha tâng neitu irhming Semera chôiin a khua irhming khom Samari a tia.

²⁵ Omria’n Rengpa mithmua thil sual a tho ngaia, a matonahai nêkin a sual uala.

²⁶ Nebata nâipa Jeroboama omdân saloi murdi a lâka, Israelhai chu a hruai sualhai a nia, an millim biakhai sik ualin Rengpa Israelhai Pathian chu a ning an mur pe a ni.

²⁷ Omria thurchi dang, a sinthotheiziahai chu Israel rênghai thurchi irziakna lekhabua a chuang.

²⁸ Omria chu a hong thi tâka, Samari khuaa an phûma, a nâipa Ahaba chu a pa irthûlin an lal nôk ta.

Israel rêng Ahaba

²⁹ Judahai rêng Asa chu kum sômthum kiriat a hong inlal kumin Omria nâipa Ahaba chu Israelhai chunga an lala, Omria nâipa Ahaba chu Samari khuaa kum sômhleihni a ophaia;

³⁰ Omria nâipa Ahaba’n a matona rênghai nêkin thilsual a tho nôk uala,

³¹ Nebata nâipa Jeroboama angin sual mai a nuam sikin, Sidon rêng Ethbaala nâinu Jezebeli chu dôngma’n a neia, Baal pathianhai a biakpui tâka.

³² Samari khuaa Baal pathian maichâm an dinga, Baal biakna hrang in a sina,

³³ Ahaba’n Asera millim a phuna, a matona Israel rêng murdihai nêkin Rengpa Israelhai Pathian ningmak a tho ual sikin,

³⁴ Ahaba inlal laiin Bethel mi Hidaia’n Jeriko khua an ding thar nôka; Nuna nâipa Josua kuang Rengpa iti tâk angin Hidaia’n lungphun a phûm tâk sikin, a nâi uliantak Abirama an châna, kul mikot a siam insa nôk sikin a nâi mitumtak Seguba khom a inchân nôk a ni.