1 RÊNGHAI 15 - PATHIAN LEKHABU IRTHIANG C.L. Bible (BSI)

Judai ram rêng Abija

¹ Nebata nâipa Jeroboama, Israelhai rêng chu kum sômhleiriat an lal kumin, Judai rama Abija khom an lala.

² Jerusalema kum thum an lala, a nu chu Maaki, Absaloma nâinu a ni.

³ A pa angin thil sual a thoa, a pu Davida inhlan angin a lungrîl chu Rengpa kuang irpe maka.

⁴ Khannisianlân, Davida zârin Rengpa a Pathianin Abija chu a thi zoia Jerusalema inlal hrangin nâipasal a pêka, Jerusalem khua khom a ihrungpui a ni.

⁵ Hit mi, Uria chunga thil saloi a tho ti no chu Davida’n a dam sûngin Rengpa mithmua thil sa a thoa, a thupêkhai khom a zôm ngaia.

⁶ Abija roirêl sûng chu Jeroboama leh an irdoi maia.

⁷ Abija thurchi dang, a sinthohai chu Juda rêng thurchi irziakna bua a chuang.

⁸ Abija chu a thia, Davida khopuia an phûma, a nâipa Asa chu a pa irthûlin an lal nôk ta.

Judahai rêng Asa

⁹ Israel rêng Jeroboama inlal kum sômhni a niin, Asa chu Judai rama an lala.

¹⁰ Kum sômminli inkhat Jerusalema an lala, a pi chu Absaloma nâinu Maaki a ni.

¹¹ Ama khom a pu Davida angin Rengpa nuam lam a zong ngaia.

¹² Millim pathian biakna hmuna nupang le pasal irzuar mihai chu an hnotsuakhaia, a puhaiin millim pathian an isiam murdi an siatpai pehaia.

¹³ A pi Maaki’n Aseri irlim intirom tak a phun sikin rêngnu a initna ata a paia. Asa’n millim pathianhai chu a tukirkithaia, Kidron phâiruama a hâla.

¹⁴ A ram sûnga pathian dang an ibiakna ngai hmun murdi khom rêng Asa hin an siat pehai zoi no khomin, khannisianlân, a dam sûng chu Rengpa vai hin a’rnghata.

¹⁵ A pa’n Pathian kuanga a thilpêk murdi chu Asa hin tempila a siaa, ama kut ngêtin rângachak le sumru a inhlan chu a siaa.

¹⁶ Juda rêng Asa le Israel rêng Baasa chu an inlal sûng an irdoi maia.

¹⁷ Israel rêng Baasa’n Judai ram a hong doia, Judai ram ata mi an zuang suaka, mi dang Judai rama an lût thei loina hrangin Ramah khuaa kul a siama.

¹⁸ Asa’n tempil sum thunna rengata le rêng ina rângachak le sumruhai chu a lâksuaka, Damaska khuaa om Suria rêng Benhadada kuang a thona. Benhadada chu Heziona tupa, Tabrimona nâipa a ni. A mi tîrhai khan hiang hin an hrila.

¹⁹ “Ka pa le ni pa an irkop ang khan, en roh rângachak le sumru nang ki hong thon. Israel rêng Baasa le rual nin irchangna hi teipuiin lân, ei ram sûnga sipaihai hruai paihai ri se,” a tia.

²⁰ Benhadada’n Asa iti pe angin a lei pompuia, a sipai ulian a koia, a sipaihaiin Israel ram chu an rûnhaia. Ijon hai, Dan hai, Abela Beth Maaka hai an lâka, Galili dîl kôla ramhai khom Naftalia bial pumpui an lâkpai pehai tâka.

²¹ Kha thu kha rêng Baasa’n an hriatin chu Ramah khuaa a kul siam chu a’rngama, Tirza khuaa a om ta a ni.

²² Reng Baasa’n Ramah khuaa a kul siama lung le thing a ihmanghai chu va la hrangin Asa’n Juda rama mihai chu an phûthaia. Benjamina biala Geba le Mizpa khua kul siamna hrangin a hmanga.

²³ Reng Asa sin tho dang, a hâi lamhai, khua a irkul lamhai chu Juda thurchi irziakna lekhabua a chuanga. A tar tiang chu a kea natna saloi irveiin kalchôi thei loi bokvâkin a oma.

²⁴ Asa chu a thia, Davida khopui rêng irphûmna hmuna an phûma, a nâipa Jehosafata chu ama irthûlin an lal nôk ta.

Israel rêng Nadaba

²⁵ Judahai rêng Asa inlal kum hnina rengata chu rêng Jeroboama nâipa Nadaba chu Israel rama an lal nôka, kum hni roi a rêla.

²⁶ A pa ang ngêtin Rengpa mithmua thil sual a thoa, Israelhai chu a hruai sualhai tâka.

²⁷ Ahija nâipa Baasa Isakara nam a inei khan Nadaba chu a huanga a sipaihai leh Filistia rama Gebethon khuaa an om lai takin Baasa’n Nadaba chu a thata.

²⁸ Juda rêng Asa inlal kum thumna chu Baasa’n Nadaba chu a thata, ama irthûlin Israel rama an lal tâka.

²⁹ Reng a hong chang zoi le zel Jeroboama in mihai chu a thathai vinga. Rengpa khan a siahlo Ahija Silo khua mihai kuang a ihril tâk ang khan, Jeroboama in mihai chu tûte hôi loiin a thathai ving tâka.

³⁰ Jeroboama thil saloi tho sikin, Israelhai chu a hruai insualhaia, kha thua khan Rengpa Israelhai Pathian ning an murtira.

³¹ Nadaba thurchi dang, a sintho murdi chu, Israel rênghai thurchi irziakna lekhabua a chuang.

³² Judahai rêng Asa le Israel rêng Baasa chu an inlal sûng an irdoi mai a ni.

Israel rêng Baasa

³³ Juda rêng Asa inlal kum thumna Ahija nâipa Baasa chu Israel mihai chunga an lala, Tirza khuaa kum sôminhni kum minli roi a rêla.

³⁴ Rengpa mithmua thil sual a thoa, Jeroboama angin Israelhai hruai insualtu a ni.