1 RÊNGHAI 14 - PATHIAN LEKHABU IRTHIANG C.L. Bible (BSI)

Jeroboama nâipa thina

¹ Jeroboama nâipa Abija chu dam loiin a oma,

² Jeroboama’n a dôngma kuang khan, “Ki dôngma ni nih ti tûte’n nang an inhriat thei loina hrangin irvo danglamin tho’n lân, Israel rêng ki ichang hrang thu ni hriltu deipu Ahija Silo khuaa om kuang son va fe’n lân,

³ bai tiam sôm le kêk tômte le khuaitui chînte chôi pe’n lân, ei nâipa om hrang lam hi nang lan hril thei a ti,” a tia.

⁴ A iti angin a dôngma chu Silo khuaa Ahija ina a va fea. Ahija chu a lei tar tâk sikin len fel thei ta maka.

⁵ Rengpa khan Ahija kuang, “Jeroboama dôngma a nâi dam loi thu irdon hrangin a honga, hiang hin lei ti pe roh. Mi papai angin irvo danglam pai a ni,” a tia.

⁶ Inkhâra a hong lût irhâi Ahija’n a len hriatin chu, “Hong lût ro, Jeroboama dôngma kha mo ni mak che? Ithoa irvo danglam mo ni ni? Thurchi saloi tak nang len hril rong,” a tia.

⁷ Fe’n lân, Rengpa Israelhai Pathian thu suak hi, “Jeroboama kuang hiang hin van sîr pe roh. Mipuihai lai ata nang ki chôiirsânga, ki mi Israelhai hruaitu hrangin nang ki siaa.

⁸ Davida-hai in mi ramhai nang ki lâk pea, ipêk ni nia, khannisian, Davida angin om mak chea, ama’n chu ki thupêkhai a zôma, a dik takin a ni zuia, ki mithmua thil dik a tho ngaia.

⁹ Nang chu ni matona mihai nêkin ni sual uala; ki itheimâk tak, pathian danghai, millimhai siamin ni ni mâksana.

¹⁰ Hitak sik hin nir chia pasal nâi om murdi nâite ata ulian dênin inram ving ki ti, sahrok phît infâi angin nir chihai phît infâi la ni a ti.

¹¹ Jeroboama urênghai, khopuia thihai ruak chu uihaiin fa an ta, ram danga thihai ruak chu chunglêng vahaiin hrût an ti, hi hi Rengpa thu suak a ni,” a tia.

¹² “Nang khom fe’n lân, khua ni lût chakin ni nâi chu thi a ti,

¹³ Israel mi murdi’n châ an ta, phûm an ti, Jeroboama in mihai laia chu ama vai hi Rengpa Israelhai Pathian mithmua satak a ni sikin Jeroboama irchihai laia chu thâna phûm ni a ti.

¹⁴ Jeroboama-hai in sûngkua inhekpai hrangin Rengpa’n Israelhai laia roirêltu a indittak inthang lat a ti.

¹⁵ Rengpa’n Israelhai chu soisakhai a ta, tuipui kôla phâiruang kung angin inhnîng sup sup an ti. Israel mihaiin pathiannu Aseri irlimhai an siama, Rengpa ning an inmurtir pe sikin, an puhai ata ram satak a ipêkhai ata chu inhnotsuakhai a ta, Eufrates tui râla semindarh ving an ti.

¹⁶ Israelhai chu Jeroboama’n a hruai sualhai sikin, Rengpa’n chu masanhai a ti,” a tia.

¹⁷ Jeroboama dôngma chu Tirza khua tiang a kîr nôka, in sûng a va tung le zel a nâi chu a thi pe ta a ni.

¹⁸ Rengpa siahlo Ahija’n a lei ihril tâk angin Israel mihaiin nâipang chu an châ tâka, an iphûm a ni ta.

Jeroboama thina thu.

¹⁹ Jeroboama thurchi dang chu a râl doina, le a roirêl dânhai chu Israel rênghai thurchi irziakna bua a chuang.

²⁰ Jeroboama chu kum sômhni inhni sûng an lala, a thia phûmin a oma, a nâipa Nadaba khan a hmun a lua nôk ta.

Rehoboama Judai ram rêng

²¹ Solomona nâipa Rehoboama chu kum sômminli kum khat a ni leh Judai rama an lal irphuta. Israel pumpuiin ama biakna hmun hrang Rengpa inthang Jerusalema kum sômhleisari roi a rêla, a nu chu Amon nama mi Naami a ni.

²² Juda mihai chu Rengpa mithmua a sân an sual sikin, an puhai nêkin Rengpa ning an mur pe uala.

²³ Millim pathian biakna hmun tamtak an siama, tâng sîphai le thing hnuai haia, lung saloi le pathiannu Aseri irlimhai an phuna.

²⁴ Khahai nêka la sual ual chu an millim siam laia nupang le pasal enhoi loitaka an om laihai siamin an oma, Israel nâihai Kanaan rama an hong lûta an inhriat suakhai nam an omdân saloi murdi chu Judahai hin an irchu tâk a ni.

²⁵ Reng Rehoboama inlal kum ringana Aigupta rêng Sisaka khan Jerusalem a doia.

²⁶ Rengpa tempila irchon, rêng ina irchon le Solomona ina rângachak pho a isiamhai chu a lâkpai vinga.

²⁷ Reng Rehoboama’n kha pho an ilâkpai pehai irthûlin dâr thîrin pho a siam nôka, rêng in enkoltu kuta a pêkhaia.

²⁸ Reng khan Rengpa tempila a fe rikipa a enkoltuhaiin pho chu an chôia, kha zoiin chu a siana hmuna an isia nôk ngai a ni.

²⁹ Rehoboama thurchi danghai le a sin thôna thu chu Juda rênghai thurchi irziakna bua a chuang.

³⁰ An lal sûngin Rehoboama le Jeroboama chu an irdoi maia.

³¹ Rehoboama chu a thia, Davida khopuia an phûma, a nu chu Naami, Amon mi a ni. A nâipa Abija’n a ithûl nôk a ni.