1 RÊNGHAI 13 - PATHIAN LEKHABU IRTHIANG C.L. Bible (BSI)

¹ Jeroboama chu maichâm bula thilinhlan hranga a ngîr laiin, Rengpa itîr deipu, Judai ram ata Bethel hmuna a hong tunga.

² Rengpa thupêk angin deipu khan maichâm kha hiang hin ar kôka; “Maichâm, maichâm, Rengpa’n hiang hin a ti. Davida irchi ata ar hming Josia a suaka, ni chunga millim pathianhai kuang, rimhoi hâlhai ngai deipuhai chu hâlhai a ta, ni ruhai leh hâl irhmang ni a tih tiin.

³ Deipu khan a sunzom maia, hi maichâm hi khoiphat a ta, a chunga meirivâm khom indarh ving a ti. Khanchu Rengpa khan, keima ni hmangin thu a ihril a nih ti lan hria ni ti,” a tia.

⁴ Bethel-a maichâm chu Pathian mi’n ar kôk a nih ti rêng Jeroboama’n an hriatin chu, maichâm bul ata a va’rkôka, “Chelpai roi,” a tia. Kha zela khan rêng kut chu châng thei maka, inban thei ta maka.

⁵ Maichâm chu a’rphaltir hlanga, meirivâm chu Rengpa deipu’n a ihril ang khan hnuaia a’rthek indarh zoi ta.

⁶ Reng Jeroboama’n deipu kuang khan, “Lungkham takin Rengpa ni Pathian kuang ki bân damna hrang ni zong pe ro,” a tia. Deipu khan Rengpa kuang a chongchai pea, rêng bân chu a dam pe ta.

⁷ Reng khan deipu kuang, “Ki ina hongin lân, ki kôla fâk nêk zong ro; khanchu lômman nang pe ki ti,” a tia.

⁸ Deipu khan rêng kuang, “Ni sum a chimrip ni ni pêk hrang khomin, ni ina chu hong no ning, ite fâk nêk khom fa no ning.

⁹ Rengpa khan ite fâka in loi hrang le ki hongna khom kîr loi hrangin a ni ti a ni,” a tia.

¹⁰ Khanchu Bethel panna a hongna lampui tiang fe loiin a dang tiang a fe ta.

¹¹ Deipu tar inkhat hi Bethel-a khan a oma. A nâipa inkhatin kha nia Judai ram ata deipu hong Bethel-a a sintho le rêng Jeroboama kuanga a thuhrilhai chu an sîr pea.

¹² Deipu tar khan a nâihai kuang, “kho tiang mo a ife tâk kha,?” a tia. A fena lampui an inhrila,

¹³ Sakuartung kha irsiamtir roi a tia, a fena hrang an irfûktir pe zoiin chu;

¹⁴ Judai ram ata deipu hongpa chu a’rzûl tâka. Ama chu Sesua thing dâihlim hnuaia a lei toia, “Judai rama deipu kha mo ni ni?” a tia. Ama khan, “O ki ni” a tia.

¹⁵ Deipu tarpa khan, “Hongin lân ki ina bu hong ne ro,” a tia.

¹⁶ Judai rama deipu khan, “Nangma leh hmunkhata fe zât ni ma unga, ni kôla bu anh fâk zât khom ni ma ung.

¹⁷ Rengpa’n ite fa loi hrang le ki hongna lampui tiang kîr loi hrangin a ni iti kêng,” a tia.

¹⁸ Bethel-a deipu tarpa khan a kuang, “Kei khom nangma ang dênin deipu ki nia, Rengpa itîr vântîrtônin ki kuang, ni ina fâk nêk zong hrangin ama kha hong hruai roh a ni iti a ni,” tiin minlak a thoa.

¹⁹ Judai rama deipu khan deipu tarpa chu a zuia, a kuang bu a nêkpui ta.

²⁰ Bu a nêk laiin Rengpa thu chu deipu tarpa kuang a zuang tunga.

²¹ Judai ram ata hong deipu kuang khan, “Rengpa thu zôm loiin, a thupêkhai khom zôm nuam mak che.

²² Ni kîr nôka, fâk nêk zong loi hrang a itihna hmuna ni fâk ni nêk sikin thi ni ta, ni ruak chu ni in mihai thâna phûm ni no ni,” a tia.

²³ An nêk zoiin chu, deipu tarpa khan Judai rama deipu chuangna hrang sakuartung ar fûk pea.

²⁴ An chuangtira, lampuia kâmkeibaknei a va’rtokpuia, a lei sêthat ta. A ruak chu lampuia a lei thal raka, a kôla sakuartung le kâmkeibakneihai an ngîra.

²⁵ Lampuia mi irlôihaiin a ruak chu an hmua, kâmkeibaknei a kôla nghâkpu leh khan, Bethel khuaa an van tâna, an thil hmu chu an insîr ta.

²⁶ A lei hruaitu deipu tarpa khan an hriatin chu, “E, Rengpa thupêk zôm loitu deipu kha a ni kha te. Rengpa iti angin kâmkeibakneiin sê that hrang a itipu khan a ise that a ni ta,” a tia.

²⁷ A nâihai kuang khan, “Ki Sakuartung kha chuangna hrang ni hong sin siam pe roi,” a tia. An sinsiam pe zoiin chu,

²⁸ an tâna deipu pa ruak lampuia a thal rak chu a va hmua, sakuartung le kâmkeibaknei lei ngîr a hmuhaia, kâmkeibakneiin deipu ruak chu fa viat maka, sakuartung khom ite lei ti viat ma.

²⁹ Deipu tarpa khan a ruak chu a tuama a sakuartung chunga a chôia, Bethel-a phûm hrangin.

³⁰ Deipu tarpa khan, a in mihai thâna a phûma, “O ki urêngpa, ki urêngpa,” tiin a nâihai leh an châa.

³¹ An irvûi zoiin chu a nâihai kuang khan, “Ki thi tena chu hi thâna hin kei khom ni phûm unglân hi pa kôla hin nin zâltir roi, a tia.

³² Rengpa thupêk Bethel maichâm thu le Samari irbôlna hmun thurchi a lei insîrhai chu a hong itung indik ngêt hrang a ni,” a tia.

Jeroboama siatpuina sual

³³ Israel rêng Jeroboama’n a nunchan sualna ata irlet nuam loiin, mi narânhai lai ata a maichâm siam ata sinthopui hrang deipu tharhai a siamhaia. Deipu chang nuam murdi’n hmun irsânga sintho hrangin a tihaia.

³⁴ Hi thil sual a ithohai hin, ama siatna le ar chihai dêna irhmangna a intung ta a ni.