1 PETERA toc2 1 PETERA 4 - PATHIAN LEKHABU IRTHIANG C.L. Bible (BSI)

Nunchan danglam tâkhai

¹ Krista’n taksaa a tuang sikin nangni khom khaang lungrîl kha irput roi; tukhom taksaa tuang tâkin chu sual a mâksan ta.

² Atûn rengata chu taksaa nin hring sûng chu mihriam irzuknahai irzûl ta loia Pathian nuamlama om theina hrangin.

³ Sûnhnung tiang khom Jentailhaiin an lei itho nuam ngai: hurna haia, taksa irzukna haia, zû induna haia, zu hmun raiinfânna haia, zu in irhlômna haia, millim biakna intirom tak haia nin thoa zoro nin lei hmang inhek ok tâk.

⁴ Atûn hin a hoihôkna angin nin om ta no sikin ar khêl an tia, nangni an hril insiat tâk a ni.

⁵ Khannisianlân, khahai khan, Pathian, mihring le mithihai ngaitua hranga irsiam sai kuang khan an thurchi chit anni’n lan sîr an ti.

⁶ Hi sika hin mithihai kuang khom Thurchi Sa hril a ni, mi danghai ang dêna an chungchâng rêl a nia, Pathian makunga irthaa an om theina hrangin.

Pathian thilpêk enkoltu sahai

⁷ Thil tinrêng mongna zoro chu anai tâka, nin chongchai theina hrangin lungrîl irfîm tak irputin irvong infel roi.

⁸ Thil dang nêkin milung takin lung irthung irhlôm hi uar roi, lungthungna’n sual tamtak ar khu ngai sikin.

⁹ Chiar loiin nin ina intung irhlôm ngai roi.

¹⁰ Pathian lungkhamna thilpêk tamtak enkoltu sahai angin Irtha tiang thilpêk nin idong murdi kha sin nin tho irhlômna hrangin hmang roi.

¹¹ Tukhomin thu an sîrin chu Pathian thu ngêt insîr ri se, sinthotu khomin Pathianin irzukna a ipêk angin sin ri se; khanchu Jisua Krista sikin Pathian chu itinrênga inpâka a om theina hrangin, roiinpuina le sinthotheina chu kumtuangin ama ta a ni. Amen.

Kristian nina sika tuangna

¹² Inditom takhaio, fiana irkhêl tak nin laia zuang tung hi thilirkhêl tak zuang tung tâk angin bê no roi.

¹³ Krista tuangna koppuituhai nin ni sikin lôm unglân, roiinpui taka a zuang inlang tena chu raifân le lômin nin la isip hrang a ni.

¹⁴ Krista irhminga hal nin ni’n chu nin vân a sa kêng, Irtha roiinpui tak, Pathian Irtha kha, nangnia a om tihna a ni.

¹⁵ Nin laia tukhomin, mi that sika mani, inru sika mani, thil sual tho sika mani, mi’nbuaitu a ni sikin mani, tuang no ri se.

¹⁶ Kristian nin ni sika tuang nin ni’n chu nin inzak hrang ni mah, Krista irhming nin irput sikin Pathian chôiindôm ual roi.

¹⁷ Roirêlna kha phut zoro a ni tâka, Pathian in sûng mihai ata phut ni a ti. Einia phut a ni’n chu Pathian Thurchi Sa thu iam loihai kha itin takin mo an iom hrang tâk!

¹⁸ Pathian lekha thu’n, “Mi dikhai lua saninhring hrâm an ni’n te, Pathian ngaisakloi mi sualhai kha, itin takin mo an iom hrang tâk?” a iti ang khan.

¹⁹ Khanchu Pathian lungdo anga tuanghai khan thil sa tho maiin an irtha kha Siamtu iamom tak kuang inkoltir ri sehai.