1 PETERA toc2 1 PETERA 3 - PATHIAN LEKHABU IRTHIANG C.L. Bible (BSI)

Ompui sangram chungchâng

¹ Khaang dênin nangni nuhai khom, nin pasalhai thu zôm roi, khanchu an laia Pathian thu zômloi an om khomin thu’nsîr kher nang loiin nin nunchana khan inhnê a ti,

² anni ngeiin chi puma nin om lam irthiang kha hmu an ti.

³ Pên tianga irvôna rêlirlek taka sam irvôtir hai, rângachak irthei irhli hai silkai sa irbela irvô insa tum loiin,

⁴ lungrîl ata mizia dik, lungrîla thuhnuairôl le nunhoi, irbelna siat theiloiin, irbel roi, kha kha Pathian mit hmu’n a ihlu tak tak a ni.

⁵ Khaanga khan tianlai nupang irthiang, Pathiana sabeina irnghathai kha, an pasalhai thu zômna hrangin an irvo a ni.

⁶ Sari khan Abrahama thu a zôma, “Ki Rengpa” tiin a ikoi ngai a ni. Atûn khom thil sa nin thoa, chitna rêng nin nei no’n chu Sari nâihai nin ni.

⁷ Nangni pahaio, khaang dênin ompui sangram nin ninaa nin dôngmahai indot roi, hrât loi ual an ni sikin Pathian lungkhamna thilpêk, hringna kha, nangni changpuitu an ni inhriatin inza thiamhai roi. Khanchu, nin chongchaina ite’n khâl no ni.

Felna sika tuang

⁸ A mong taka chu, nin rêngin lungrîl hmunkhat irput unglân, irkan irhlômin urêng angin lung irthung irhlôm unglân, lung irkham irhlômin thuhnuairôl takin om roi;

⁹ Sual kha sualin thuan no unglân, khuasâlna khom khuasâlna’n thuan loiin satvurhai roi; satvurna dong hrang kêngin Pathianin nangni a ikoi.

¹⁰ Pathian Lekha thu’n, “Hringna lungthung nuam le, Zoro sahai hmu nuamin chu, Sual ata a milei vêng insa sianlân, A hmûr khom huangna thu insîr loi hrangin vêng insa ri se.

¹¹ Sual irheisanin thil sa tho ri se, Irngeina zongin lungrîl pêk takin irzûl mai ri se.

¹² Rengpa mit chu mi felhai chunga a chuma, An chongchaina khom ar ngaitua ngai. Khannisian thil saloi thotuhai chu a doihai ngai,” a iti angin.

¹³ Thil sa thôna tiang irnak nin songin chu tu mo nin chunga thil saloi tho hrang?

¹⁴ Thil dik nin tho sika tuang nin niin chu vân sain irbe roi. Tukhom chi no unglân, lungindûk viat no roi.

¹⁵ Krista kha inza unglân, nin lungrîla rênga nei roi. Nangnia om nin isabei nasan chu nangni irdon murdi chu sâm hrangin irsiam diam roi.

¹⁶ Khannisianlân, thuhnuairôl le bengvâr takin, sia le sa inhriatna irthiang tak neiin tho roi, khanchu Kristaa nin om lam sa insîrinsiathai kha mualinphoiin om an ti.

¹⁷ Pathianin sa a tia tuang nin ni lele’n chu, thil sual tho sika tuang nêkin chu thil sa tho sika tuang kha a sa ual.

¹⁸ Krista khom ei sualhai sikin voikhat a thia, Pathian kuang nangni a hruai theina hrangin, mi fel chu mi felloihai ta hrangin a ithi a ni. Taksaa thatpai a nia, irtha tiang chu inhringin a om.

¹⁹ Ama khan intângna ina om, irthahai kuang thu a zu hrila.

²⁰ Khahai kha Nova irkuang tuk sûnga Pathianin tuangdiar taka a nghâk laia, zôm nuamloihai irtha kha an ni. Irkuanga khan, mi tômte, kiriat vai, tuia saninhring an ni.

²¹ Kha irangpui, baptisma hin, Jisua Krista thoinôkna sikin atûn hin nangni a isaninhring ta a ni; baptisma chu taksaa porinche irsûkinfâina vai ni maka, sia le sa inhriatna irthiang taka Pathian kuanga thu inkungna hi a ni ual.

²² Jisua Krista chu irvâna fe’n Pathian chang tiang a oma, vântîrtônhai, irchamneinahai, sinthotheinahai a thuhnuaia an om ta.