1 KORINTH 9 - PATHIAN LEKHABU IRTHIANG C.L. Bible (BSI)

Tîrtôn irchamneina le sintum

¹ Zalên mo ni ma ung? Tirtôn mo ni ma ung? Ei Rengpa Jisua mo hmu ma ung? Nangni kha Rengpa ta hranga ki sintho ra ni mak chêi mo?

² Mi danghaiin tirtônin ni bê no khomhai sian, nangni’n chu nin ni bê ngêt! Rengpa leh nin hringna a’rzom tâk sikin, ki tirtôn indangna chu nangni kha nin ni.

³ Mi’n an ni sêlin chu hiang hin ki sâm ngai:

⁴ Sin ki tho theina hranga fâknêk pêk hrangin ircham ki inei loi ma ni?

⁵ Tirtôn danghai le Rengpa urênghai le Petera hai anga khan kin zinnaa Kristian dôngma hruai hrangin ircham ki inei loi ma ni?

⁶ Khante, Barnaba le keima vai mo mânia irfâ hrang?

⁷ Tu sipai mo mânia irfaa râl doi ngai? Tu mo grep irhuan siama, a ra fa ngai loi? Tu mo kêl pâl vâia a dût in ngai loi?

⁸ Dân khomin kha dên kha a ti sikin, a nitina irkhîna hi ki iten loi a ni.

⁹ Mosia dân lekhabua khan, “Sechalpa kha bu a chîla ni hmang laiin a hmûr khit pe no roh,” ti ei tep. Pathianin sechal mo a ingaitua tak?

¹⁰ Eini hranga a insîr mo ni ma? A ni, eini hrang piala a irziak a ni. Âl kaitu le bu âttu khan dongtum tûngin sin an itho hrang a ni.

¹¹ Nin laia irtha chi kin intheka, nin kuang ata taksa thilhai ât inlân irkhêl ni mo?

¹² Mi danghai lua mina hi taksa thilhai hi, nin kuang ata tûng hrangin irchamneina an neiin teh, keini len vâng te irchamneina lian ual kin inei mo ni ma? Khannisianlân, kha irchamneina kha hmang ma ung. Krista Thurchi Sa chakal kin sak loina hrangin itinrêng kin ituang zâm zâm a ni.

¹³ Pathian biak ina sintho mihai khan biak ina irthokin an fâk hrang an hmu ngai tih le maichâma irbôlna inhlan ngaihai khomin maichâm le dongtum an nei ngai ti nin inhriat loi ma ni?

¹⁴ Khaang taka khan Rengpa’n Thurchi Sa kha Thurchi Sa insîrhai irfâna hrangin a inkung a ni.

¹⁵ Khannisianlân, keima’n chu khahai kha inkhat khom ki ihmang loi a ni; atûn khom hin ki chunga khaang khan nin thôna hranga ki irziak ni viat mah. Tukhomin ki isong hi chanlamboia an isiam nêkin chu thi zel inlân ki ta hrangin a sa ual.

¹⁶ Thurchi Sa kin sîr ringot sika irsong theina nei ma ung. Thurchi Sa hi insîr ngêt hranga dânde kêng ki ini. Thurchi Sa hi insîr no inlân chu, ki ta hrangin ichiom tak a ini hrang a ni.

¹⁷ Hi sin hi keima nuam inthangna sika ki isin ni sianlân chu thahlo tûng thei ki ti; khannisian, Pathianin hi sin a nin koltir sikin ki sintum piala bêin ki isin a ni.

¹⁸ Khante, thahlo imo ki ihmu hrang tâk? Thurchi Sa hrang sika ki sinthônaa ki’rchamneinahai hmang loia, thahlo boia ki sin hi Thurchi Sa ta hranga zoro sa a ni.

¹⁹ Tûte suak chu ni ma ung, khannisianlân, thei dôra mi ki lâklût theina hrangin mi murdi suak ki ichang a ni.

²⁰ Judahai ki lâklût theina hrangin Judahai laia chu Juda angin ki om ngai. Dân hnuaia om no khom inlân, dân hnuaia omhai kuang chu anni ki lâklût theina hrangin dân hnuaia om angin ki om ngai.

²¹ Khaang dênin, Jentailhai ki lâklût theina hrangin Jentailhai laia chu Jentailhai angin, Juda dân pên tiang ki om ngai. Kha kha Pathian Dân zôm ma ung ki itihna ni mah; Krista Dân hnuaia ki iom a ni.

²² Hrât loi ki lâklût theina hrangin hrât loihai laia chu hrât loi angin ki om ngai. Itin tak mani, senkhathai lua ki saninhring theina hrangin mi murdi kuang thil tinrêng ki ni tâk.

²³ Satvurna ki dong theina hrangin, khahai tinrêng kha Thurchi Sa sinin ki isin a ni.

²⁴ Intânirsiathai chu an rêngin an intâna, khannisianlân, inkhat vaiin lômman a hmu ngai ti nin inhriat loi ma ni? Lômman chu nin hmu theina hrangin khaang takin intân roi.

²⁵ Irsiatnaa changhaiin chu lam tinrênga an irdîn ngai. Anni chu rênglukhum siatthei hmu hrangin an irsiata, eini’n chu rênglukhum siat theiloi hmu hranga a ni.

²⁶ Khasikin thiltum neiin ki intân ngai a ni. Phâivua irchûmtu ang khan chu irchûm ma ung.

²⁷ Ki takpum denginthei nghekin ki sep ngaia, mi danghai irsiatnaa ki koibuk hnungin keima chukloia ki om loina hrangin.