1 KORINTH 8 - PATHIAN LEKHABU IRTHIANG C.L. Bible (BSI)

Millim biakna thil chungchânga chong irdon

¹ Atûn, millim biakna thil chungchânga nin thu irziak ngaitua’n: Ei rêngin inhriatna ei nei an iti angin a idik a ni. Khannisian, khaanga inhriatna khan chu mi an irpâk ngaia, lungthungna rêkin chu mi a siam insa ngai.

² Tukhomin idôr ten mani inhriatna nei tâkin ar tûngin chu, an hriat hrang lam angin a la inhriat loi a ni.

³ Khannisian, tukhomin Pathian lung a thungin chu kha mi kha Pathianin a inhriat a ni.

⁴ Khaang khan, millim biakna thil fâk chungchânga chu: rammuala millim rêng rêng hi ite an ini loizia le Pathian inkhat vai a om tih chu ei inhriat.

⁵ Irvâna mo, irnênga mo, Pathian irhming irput pathian le rêngpa, tamtak om khomsian,

⁶ Eini ta hrangin chu Pathian inkhat vai, Pa, thil itinrêng siamtu kha a oma, ama ta hrangin ei hringa, Rengpa khom inkhat vai, Jisua Krista a oma, ama sikin thil tinrêng siam a ni, eini khom ama sikin ei ihring a ni.

⁷ Khannisian, kha thutak kha mi tinin inhre mahai. Mi senkhat chu millim biak ngaiinzong an ni sikin, atûn tena hin millim ta ang taka bên an fâk rikipa an sia le sa inhriatna a’rzala, kha fâk khan a innim tâkin an irbe ngai a ni.

⁸ Khannisian, fâk hin Pathian leh ei irzomna chu ni siam insa pe thei loi a ni; fa no khom inlân ite inchân no ih, fa khom inlân ite hmu ual no ih.

⁹ Khannisianlân, nin zalênna sintho khan iamnaa hrât loihai kha suala an tûk loina hrangin irdîn roi.

¹⁰ Nangma inhriatna nei mi, sia le sa inhriatna hrât loi nei mi khan millim biakna ina ni fâk lai nang hmu sianlân, a sia le sa inhriatna khan millim biakna thil fâk an ngam hrang ni ma moh?

¹¹ Khasikin kha mihriam hrât loi, ni urêng, Krista’n a’rthûlin a ithitu kha nin hriatna sikin a irhmang hrang a ni.

¹² Khaang khan nin Kristian urênghai chunga tho’nsuala, an sia le sa inhriatna inphop pêkin Krista chunga nin tho’nsual ni a ti.

¹³ Khasikin fâkin ki urêng suala an tûktirin chu, sa fa viat ta no ning, ki urêngpa suala a tûk loina hrangin.