1 KORINTH 7 - PATHIAN LEKHABU IRTHIANG C.L. Bible (BSI)

Irneina chungchânga chong irdonna

¹ Atûn, nin thu irziak chungchânghai kha ngaitua’n: Pasal ta hrangin dôngma nei loi a sa.

² Khannisian, irditna tak a om ngai sikin pasalin dôngma bîk nei chit sianlân, nupang khomin pasal bîk nei chit ri sehai.

³ Pasalin a dôngma kuang a dongtum dôr chu pe sianlân, khaang dênin nupang khomin a pasal kuang a dongtum dôr chu pe ri se.

⁴ Nupangin ama takpum chunga khan ircham nei maka, a pasalin a nei ual, khaang dênin pasal khomin ama takpum chunga ircham nei maka, a dôngma’n a nei ual a ni.

⁵ Chongchai hranga nin irpêk theina hrang le nin irhmun nôk theina hrangin bongtea hrangin a sa nin ti seng seng no’n chu, nin irchamneina irchu irhlôm no roi; khano’nchu, nin irdîn zoi nona sikin Setana’n nangni an thêm itinin.

⁶ Hi thu hi thupêk angin insîr ma unga, phalna thu ringot angin ki insîr ual a ni.

⁷ A dik takin chu, nin rêngin keima ang hin om unglân ki inuam a ni. Khannisianlân, mi tinin an dongtum chit thilpêk Pathian kuang ata an idong chit a ni; inkhatin lam dang tiang, a dangin lam dang tiang.

⁸ Khan in nei loihai le meithâihai kuang chu hiang hin ki ti a ni: keima angin irthi phiaiin om tum mai unglân nin ta hrangin sa a ti.

⁹ Khannisian, irdîn theina nin nei no’n chu irnei roi, hur nêkin chu irnei a sa.

¹⁰ In nei tâkhai kuang khan thu ki pêk, keima thupêk chu ni loiin Rengpa thupêk: Nupangin a pasal sen no ri se;

¹¹ an irsen tâk le khom pasal dang nei ta no ri se, khano’nchu, a pasal leh ngêt om nôk ri se; pasal khomin a dôngma ma no ri se.

¹² Mi danghai kuang chu Rengpa’n ni loiin keima’n ki ti: Kristian pasalin sonong dôngma a neiin a dôngma khan a kuang om mai hrangin a milung a chuk rêng rêngin chu ma no ri se.

¹³ Khan, Kristian nupang khomin sonong pasal a neiin chu, a pasal khan a kuanga om mai hrangin a milung a chuk rêng rêngin chu ma no ri se.

¹⁴ Iamloi pasal chu a dôngma zâra irthiangtir a nia, iamloi nupang khom a pasal zâra irthiangtir a ni sa. Khaang khan ni sian, nin nâihai kha irthiang no nihai; khannisianlân, an irthiang a ni.

¹⁵ Aniachu, iamloi khan irsen a nuamin chu irsen chian ri sehai; khaang thil kha a tokin chu iamtu, nupang pasal, khit ni mahai; Pathian chu irngei hrangin nangni a ikoi a ni.

¹⁶ Kristian dôngma, ni pasal ni saninhring hrang le hrang loi, itin mo ni inhriat? Kristian pasal, ni dôngma ni saninhring hrang le hrang loi itin mo ni inhriat?

Pathian koi lam anga om hrang

¹⁷ Tukhom Rengpa’n a kuang thilpêk a ipêk lam tak le Pathianin a ikoi lam takin om ri se. Hi dân hi koiindang tina ki isiam a ni.

¹⁸ Sertan mi khan Pathian koina a pom tâkin chu, a sertan irsinsia kha pai a tum hrang ni mah; Sertanloi mi khomin Pathian koina a pom tâkin chu, ser a itan hrang ni mah.

¹⁹ Pathian thupêkhai zôm ti no zel chu sertan le tanloi ite ni mah.

²⁰ Tukhom Pathianin a koi laia a iom lam ang tak khan om mai ri se.

²¹ Pathianin nang a ikoia khan suaka om mo ni ini? Ngaitua no roh; khannisian, zalênna zoro ni manin chu hmang ual ro?

²² Suak, Rengpa’n a ikoi chu Rengpa insua suak a nia, khaang dêna khan suak ni loi Krista’n a ikoi khom kha Krista suak a ni.

²³ Pathianin mana nangni a irchôk tâk kêng; khasikin mihriamhai suak chang no roi.

²⁴ Urênghai, tukhom Pathianin a koi laia a om lam ang khan Pathian leh irpôlin om mai ri se.

Lênglaihai le meithâihai chungchânga chong irdon

²⁵ Atûn, lênglaihai chungchânga nin thu irziak kha irngaitua’n: Rengpa ata thupêk chu nei ma ung, khannisianlân, Rengpa lungkhamna sika iiam rua mi ki ni sikin ki’rngaidân insîr ki ti.

²⁶ Atûnlai intakna ngaitua’n, mi a om lam ang taka a iom mai hi sa le ki’rhoitir.

²⁷ Dôngma mo ni nei tâk? Zôkna zong no roh. Lênglai mo ni la ini? Dôngma zong no roh.

²⁸ Khannisianlân dôngma ni nei leh khom tho’nsual mak che; dôngmate khomin pasal a neiin tho’nsual mah. Khannisianlân, in nin neiin chu rammuala dengthei nin ti; kha kha nangni inzôk ki inuam a ni.

²⁹ Urênghai, ki iti nuam tak chu hi hi a ni: zoro hi a bong ta; atûna irthokin chu dôngma neihai kha nei no angin omhai sianlân,

³⁰ chaphai kha chap loi angin omhai sianlân, lômhai chu lômloi angin omhai sianlân, ar chôkhai khan nei loi angin omhai sianlân;

³¹ hi rammual hmangtuhai chu hmang ta hrai loia an om theina hrangin zoro hi inbongin a iom a ni; hi rammual om dân hi a irhmang thiai a ni hi.

³² Lungdûk nei loi hrangin nangni ki nuam a ni. Ruatharte’n chu Rengpa inlôm a tum sikin Rengpa sin kha a ngaitua ngai.

³³ Khannisianlân, dôngma nei sikin rammual thilhai a ngaituah ngaia;

³⁴ Khasikin kailangka’n a iom ngai a ni. Dôngmate’n chu a takpum le ar tha inhlan rip a nuam sikin Rengpa sin kha a ngaitua ngai; khannisian, pasal a nei tâkin chu a pasal inlôm a nuam sikin rammual thilhai a ngaitua ngai.

³⁵ Kha kha nangni changpui ki nuam sika ki iti a ni. Nin chunga dân ngar khang tum ma ung. Thil dik le malam panna thil sin hrang le Rengpa sinthônaa ite hôi viat loia irpêkhlet hrangin nangni ki inuam a ni.

³⁶ Dôngmate le ruatharte irnei thu infel tâk, irnei nôk ta loi hrang tihai chungchâng thua chu: ruatharte kha a dôngmate tianga khan mahripa omin ar dîn thei noa an irnei a nang ti an hriattin chu irnei ri sehai, a inuam angin, tho’nsual mah.

³⁷ Khannisianlân, a nang ti loia, kha dôngmate kha nei loi hrang a lungrîl det taka sinsiama, a nuamlam septheitu khan chu om hrang dân a lungrîla a ngaitua zoi ta, dôngmate kha a nei no sikin a tho’n sa.

³⁸ Khasikin ruatharte, dôngma neitu khan a tho’n sa, khannisian a nei loitu khan a tho insa ual.

³⁹ Nupang kha a pasal hring sûng chu a pasal ikhit a nia; khannisian, a pasal a thiin chu a inu nuam a nei thei, Kristian a ni ngânin chu.

⁴⁰ Khannisianlân, a om ngaiin om sianlân, a raifân ual a ti. kha kha ki’rngaidân a ni, kei khom Pathian Irtha chu ki neiin ki irbe a ni.