1 KORINTH 4 - PATHIAN LEKHABU IRTHIANG C.L. Bible (BSI)

Krista tirtônhai

¹ Keini hi Krista tirtôn le Pathian thutak irthup enkoltuhaiin ni bê roi.

² Enkoltu hranga inkunghai chu an iiamom phot hrang a ni.

³ Nangni’n mo mi dangin mo nin ni fiana hi itea bê ma ung, keima lakin irfia ngai ma ung.

⁴ Itea irdemna hrang inhre ma ung, sêlna boi ki ni tihna lak ni mah, ni fiatu chu Rengpa a ni.

⁵ Khanchu Rengpa zuang nôk mâka chu a zoro loia tûte insîr insiat no roi. Rengpa zuang mâka chu, ama’n inthima thup irhmanghai chu ivâra hong inlang an ta, lungrîla tumna irthuphai khom inlang sa a ti. Khanchu, mi tinin mâni irphu tôka Pathian inpâk hlo seng an ti.

⁶ Urênghaio, hi thu, “Thu irziak chu khêl no roi,” iti chong omzia nin irchu theina hrangin keima le Apolova hi nin enton hrangin ki hong itârlang a ni; tûte’n inkhat songin mi dang enkhûm no roi.

⁷ Tu mo mi chunga ulian nangni siam? Nin idonghai kha Pathian nangni ipêk ni ma mo? Nin dongin teh ithoa mo dong no anga nin irsong?

⁸ Nin irsam tinrêng nin inei tâk ma ni? Kin om no khoma rêng nin ichang thei tâk ma ni? Reng chang thei tak tak unglân ki nuam vang na, keini khom nin rêng kin changna hrangin.

⁹ Pathianin keini tirtônhai hi thi hranga inkung ang dênin, irnêng le irvân vântîrtôn le mi murdi enhoi hrangin a hnungkhôn taka a ni isia mani ki ti ngai.

¹⁰ Keini chu Krista sikin mi’nvêt kin ni, nangni chu Krista zâra mi vâr nin ni. Keini chu hrât ma unga, nangni chu nin hrâta, keini chu mihaiin an ni hmusita, nangni chu nangni an ngaisâng a ni.

¹¹ Atûn ten phîngchâm le tuiinhrâlin kin oma, silkai kin irsama, mi tôkhmol kin tuanga, kin invâi a ni.

¹² A sân kuta sintho’n fâk kin zonga, mi’n khomâk an ni sâm le sat kin vurhaia, deng an nin theitir le diar takin kin tuanga,

¹³ mi’n an ni êro le dâiriamin kin sâm ngai. Hi rammuala sahrok leh danglam ual ma ung, atûn ten khom hin irnênga nokkok ang kin ni.

¹⁴ Hi thu ki irziak hi nangni inzakna hrang ki tia ni loiin, ki nâi lungthunghai angin nangni irchu ki nuam sika a ni.

¹⁵ Krista khan enkoltu sîngkhat (10,000) khom nei unglân, Pa chu inkhat vai nin inei a ni. Nin laia Thurchi Sa hong intungna Krista Jisua leh irzoma nin hringna khan nin Pa ki hong ini a ni.

¹⁶ Khasikin keimaa irthoka irchu hrangin nangni ki ngên.

¹⁷ Hi chungchânga hin, Timothea, Rengpaa ki nâi lungthung le iamom kha nin kuang ki hong tîr. Ama khan Krista leh irzoma hringna thara ki om dân ram tina koiindang tinhai ki’rchutir ngai lam ang khan nangni inhriatir nôk a ti.

¹⁸ Nin laia hong ta loi hrang ni sônin mi senkhat chu nin irsong a ni.

¹⁹ Khannisianlân, Rengpa’n sa a ti’n chu, nin laia hong lat ki ti, khanchu hi mi irsonghai thu chu ni loiin, an sinthotheina kha inhre thei ta ki ti.

²⁰ Pathian Ram chu thu vaia irnghat mah, sinthotheinaa a irnghat ual a ni.

²¹ Imo nin inuam? Tôkhmol leh mo nin kuang ki ihong hrang, aninole lungthungna le thuhnuairôl lungrîl irputin?