1 KORINTH 2 - PATHIAN LEKHABU IRTHIANG C.L. Bible (BSI)

Krista hembea om thu

¹ Urênghaio, Pathian thutak irthup insîra nin laia ki hong laia khan thu roiinpui le vârna roiinpui leh hong ma ung.

² Nin laia ki om khoma khan thil dang murdi irnghil zitin Jisua Krista hembea om thu vai kha inhriat ki tum ngai a ni.

³ Khaang khan nin laia ki hong laia khan inhriat loi le ichia inthing pumin ki oma.

⁴ Ki bâia irthoka irchûna thu suak le ki thu insîrhai khom kha mihriam vârnaa inthêmna thu ni maka, Pathian Irtha sinthotheinaa inhriatna thu a ni ual.

⁵ Khasikin nin iamna kha mihriam vârnaa irnghat maka, Pathian sinthotheinaa a irnghat a ni ual.

Pathian vârna

⁶ Khan khom, irthaa ulianhai kuang chu vârna thu kin sîr ngaia. Khannisian, hi rammual vârna thu chu ni maka, hi rammual roirêltu, an inlalna irhmang thiaihai vârna thu khom ni mah.

⁷ Pathian vârna thu irthup kha ki insîr ual ngai a ni, vârna thu irthup, ei roiinpuina hranga Pathianin rammual om mâna a lei inkung sai tâk kha.

⁸ Kha vârna kha hi rammual roirêltuhai rêng rêngin inhre mahai. Inhrehai sianlân chu, roiinpuina Rengpa kha hembe no nihai.

⁹ Pathian Thu’n, “Pathianin ama lungthunghai ta hranga an irfûk angin chu, Mita hmu ngailoi le mikuara inhre ngai loi. Mihriam lungrîla lût ngai loi a ni,” a iti angin.

¹⁰ Eini chu Pathianin a thutak irthup kha Irtha’n a nin hriat tâka. Irtha khan tinrêng a suisuak ngai Pathian thil tum inthûk tak khom.

¹¹ Mihriam thil tum kha a sûnga om, ama irtha vai kêng an hriat ngai. Khaang dênin Pathian Irtha vaiin kêng Pathian thil tumhai an hriat thei.

¹² Ei idong hi rammual irtha ni maka, Pathianin thil a ni ipêkhai tinrêng ei inhriat theina hrangin Pathian zu itîr Irtha kha ei idong ual a ni.

¹³ Khasikin mihriam vârna irchutirin insîr ngai ma unga, Irtha irchutirin kin insîr uala, irthaa thutak kha Irtha mihai kuang kin hrilfia ngai.

¹⁴ Tukhom Irtha nei loiin chu Pathian Irtha ata thil pêkhai kha dong thei ma. Kha mi khan chu kha thilhai kha inhre thei mah; ama ta hrangin chu invêtna kai a ni, a hlutzia kha irtha vaia inhre thei a ni sikin.

¹⁵ Tukhom Irtha nei ka kaiin chu thil tinrêng hlutzia an inhriat ngai, khannisian, ama chu tûte’n inhre thei ngai mahai.

¹⁶ Pathian thu’n, “Tu’n mo Rengpa lungrîl inhriat? Tu mo irchûna chong pe thei hrang?” a iti ang khan. Khannisian, eini’n chu Krista lungrîl ei irput.