1 JOHANA 5 - PATHIAN LEKHABU IRTHIANG C.L. Bible (BSI)

Iamna hi rammual inhnêna

¹ Tukhom Jisua hi Krista kha a nih ti iam murdi chu Pathian nâi an ni. Tukhom Pa lungthungtu khan nâi khom lung a ithung sa ngai a ni.

² Pathian nâihai lung ei thung a ni ti ei inhriatna chu, Pathian lung ei thunga, a thupêkhai ei izôm hi a ni.

³ Pathian lung ei thungna chu hi hi a ni: a thupêkhai zôm hi; a thupêkhai chu eini ta hrangin ngar mah.

⁴ Pathian nei murdi’n chu rammual hi an hnê ngai: hi hi a ni rammual inhnêa ngamna chu, ei iamna hi.

⁵ Jisua hi Pathian Nâipa a nih ti iamtu vai no chu tu mo rammual hi inhnê thei hrang?

Nâipa chungchânga thu inhretu

⁶ Jisua Krista hi a ni, tui le thisena zuang kha, tuia vai ni loiin, tuia le irthaa a ni ual; Irtha kha an hriatpuitu a ni. Irtha kha thutak a ni.

⁷ Inhriatpuitu inthum an om:

⁸ Irtha, tui, le thisen kha, kha inthumhai kha an lunginrual a ni.

⁹ Mihriam inhriatpuina lua ei pomin te Pathian inhriatpuina kha a roiinpui ual a ni; Pathian inhriatpuina kha, A Nâipa thurchi an hriattir takna hi a ni.

¹⁰ Tukhom Pathian Nâipa iamtu’n chu amaa hin inhriatna hi a nei a ni: Pathian iamloitu chu Pathian kha milaka a inchangtir a ni, Pathianin a Nâipa thurchi an hriattir kha a iamno sikin.

¹¹ Hi hi a thu inhriattir chu a ni, Pathian khan kumtuang hringna a ni pêka, kha hringna kha a Nâipaa hin a iom a ni.

¹² Tukhom Nâipa nei murdi’n chu hringna kha an nei ta, Nâipa nei loiin chu hringna kha nei mahai.

Kumtuang hringna

¹³ Kumtuang hringna nin nei ti nin inhriat theina hrangin nangni Pathian Nâipa irhming iamtuhai kuang hi thu hi ki irziak a ni.

¹⁴ A nuamlam anga i khom ei ngênin chu a nir ngaitua ngai, kha kha a kuanga ei ngamna chu a ni.

¹⁵ Ei ngên zoro rikipin a nir ngaitua ngai ti ei inhriat sikin ei ingên ang kha a ni pêk ngai ti khom ei inhriat.

¹⁶ Tukhomin, a urêng, thina dôr ni loi sual tho’n hmu sianlân, ngên pe a ta, Pathianin hringna pe a ti. Hi hi thina dôra sual tho loihai hranga a ni. Khannisian, thina hrang dôr sual a oma, khaanghai ta hrangin ngên pe hrang ti ma ung.

¹⁷ Thil dikloi tho rêng rêng hi sual a ni zita, aniachu sual murdi hi thina hrang dôr sual ni mah.

¹⁸ Tukhom Pathian inei chu thil tho’nsual mah ti ei inhriata; Pathian Neitu khan a vong inhringa, mi sual khan a itôn theiloi a ni.

¹⁹ Rammual pumpui hi Mi sualpa thuhnuaia om sian khom Pathian ata suak ei nih ti ei inhriat.

²⁰ Pathian Nâipa kha a zuanga, Pathian tak kha inhre thei hrangin inhriat theina a ni pêk ti ei inhriat sa; khanchu Pathian tak khan ei iom a nia, Nâipa Jisua Kristaa khan. Hi hi a ni Pathian dik tak kha, hi hi a ni kumtuang hringna chu.

²¹ Nâihaio, millim ata irkiang roi.