1 JOHANA 4 - PATHIAN LEKHABU IRTHIANG C.L. Bible (BSI)

Irtha dik le dikloi

¹ Inditom takhaio, irtha narân hi iam no roi, irtha chu Pathian ata zuang suak a ni le ni loi fia bak ngai roi; deipu dol tamtak rammuala an hong suak tâk sikin.

² Hi hi Pathian Irtha nin inhriat theina hrang chu a ni: Tukhom Jisua Krista chu taksa’n a zuang tih thoptu murdi chu Irtha a idong kha Pathiana suak a ni.

³ Jisua thoploihai irtha dong kha Pathian ata suak ni ma: kha kha Krista doitu hong hrang ti nin inhriat kha a ni, atûn khom rammuala a iom mai ta a ni.

⁴ Nâihaio, nangni chu Pathian ata suak nin nia, nangnia om Irtha kha rammuala om nêkin chu a roiinpui ual sikin deipu dolhai kha nin ngam tâk kêng.

⁵ Anni kha rammuala mi an nia; khasikin rammuala mi angin thu an insîra, rammualin an thu an irngaitua ngai a ni.

⁶ Eini chu Pathian ata suak ei ni; Pathian inhretuhai khan ei thu khom an irngai ngai; Pathian ata suak loi chu ei thu khom irngaitua mahai; khataka khan irtha diktak le dikloi ei inhriat thei a ni.

Pathian chu lungthungna a ni

⁷ Inditom takhaio, lung irthung irhlôm ei ti, lungthungna chu Pathian ata zuang suak a ni; tukhom lungthungna nei ka chu Pathian nâi a nia, Pathian an hriat sa ngai a ni.

⁸ Tukhom lungthungna nei loiin chu Pathian inhre mahai, Pathian chu lungthungna a nia.

⁹ Pathian lungthungna chu hi ang hin ei kuang a zuang inlang, ama zâra hringna ei nei theina hrangin Pathianin a Nâipa neisun rammuala a zuang tîra hin a ni.

¹⁰ Hi ngêt hi a ni lungthungna chu: Eini’n Pathian lung ei ithung ni loiin, Ama’n lung a ni thunga, ei sual thuphachôina hrangin a Nâipa a zuang tîr tâk a ni.

¹¹ Inditom takhaio, Pathianin khaang dôrin lung a ni thungin te, eini khom lung ei irthungirhlôm seng hrang a ni.

¹² Tukhomin Pathian hmu ngai mahaia chu, lung ei irthung irhlômin chu Pathian einia a om maia, a lungthungna khom einia irkiptirin a iom a ni.

¹³ A’rtha ni pêk hi Amaa ei oma, Ama khom einia a om tih ei inhriatna chu a ni.

¹⁴ Pa’n Nâipa kha rammual Saninhringtu hrangin a zuang tîr ti ei hmu tâka, mi dang khom ei inhriattir a ni.

¹⁵ Tukhom Jisua kha Pathian Nâipa a nih ti thoptu chu amaa khan Pathian a om maia, ama khom kha Pathiana a om mai a ni.

¹⁶ Pathianin lung a ni thungna chu eini ngêtin ei inhriata, ei iam ta a ni, Pathian chu lungthungna a nia, kha lungthungnaa om mai kha Pathiana a om maia, Pathian khom amaa a om mai a ni.

¹⁷ Roirêl nikhua kha chi viat loia ei om theina hrangin einia lungthungna chu irkiptir a ni ta; rammuala khom hin ama ang takin ei iom ta a ni.

¹⁸ Lungthungnaa hin chitna rêng om maka, lungthungna irkip khan chitna murdi an hnot irhmang ngai. Chitna hi hremna a ni sa, ichia om chu lungthungnaa a la irkip loi a ni.

¹⁹ Ama’n lung a ni thung masa sikin eini khomin lung ei ithung a ni.

²⁰ Mi’n, “Pathian lung ki thung,” tiin a urêng khôkmâk sian, milak a ni; a urêng a ihmu mai lua lung a thung no’n te, Pathian a ihmu ngailoi kha itin mo lung a ithung thei hrang?

²¹ Krista’n thupêk a ni ipêk chu hi hi a ni: Tukhom Pathian lungthungtu khan a urêng khom lung a ithung sa hrang a ni, ti hi.