1 JOHANA 3 - PATHIAN LEKHABU IRTHIANG C.L. Bible (BSI)

Pathian nâihai

¹ Irngai u ta, Pa lung ni thungna hi a lûminna bâka! Pathian nâihaia a ni ibe tâk hi; khaang kha ei hong ini kêng. Hi sika hin rammualin nin hre ma, ama kha an inhriat no sikin.

² Inditom takhaio, atûn hin Pathian nâihai ei ni tâka, itin mo ei la iom hrang tih chu lan lang mah. Ama a zuang inlâr tika chu ama angin om ei tih iti ei inhriat, a nilam ang takin ama kha ei la hmu hrang sikin.

³ Tukhom, Kristaa sabeina nei murdi’n chu ama a irthiang angin a’rthianginfâi ngai.

⁴ Tukhom, thil sual tho chu dân a insiat a ni, sual chu dân insiatna a nia.

⁵ Ama kha sualhai lapai hrangin a hong inlanga, amaa khan sual om mah ti nin inhriat.

⁶ Tukhom Kristaa om mai chu thilsual tho mah; tukhom thil sual tho chu Krista hmu maka inhriat khom inhre mah.

⁷ Nâihaio, tukhomin nangni huang no ri sehai; Krista kha mi dik tak a ini angin thil dik thotu kha mi dik a ni.

⁸ Thil sual thotu chu Diabola ata suak a ni; a phut rengata Diabola khan thil sual a thoa. Pathian Nâipa a zuang inlangna san chu, Diabola sinthohai inboi hranga a ni.

⁹ Tukhom Pathian nâi chu sual ngai maka, Pathian nitna tak amaa a om maia; Pathian kha a pa a ni sikin a isual thei ta loi a ni.

¹⁰ Pathian nâihai le Diabola nâihai inlang infelna chu hi hi a ni: tukhom thil dik tholoi le a urêng lungthung loi chu Pathiana suak ni mah.

Lungirthung irhlômna

¹¹ A phut ata thu nin inhriat kha: lung ei irthung irhlôm seng hrang a nih ti hi a ni.

¹² Mi sual ata suak Kaina, a urêngpa Abela that anga khan chu om no iduah. Ithoa mo a ithat kha? Ama sinthohai a suala, a urêngpa sinthohai a fel sikin.

¹³ Urênghaio, rammualin nangni a khôkmâk khomin ar khêl ti no roi.

¹⁴ Eini chu urênghai lung ei thung sikin thina ata ei suaka, hringnaa ei lût ta tih ei inhriat: lungthungna nei loi chu thinaa a la iom mai a ni.

¹⁵ Tukhom, a urêng khôkmâk chu mi that a ni, tukhom mi that chu kumtuang hringna nei no nih ti nin inhriat.

¹⁶ Ama’n ei ta hrangin a hringna a ipêka hin, lungthungna kha ei inhriat ta. Eini khomin urênghai hrangin ei hringna hi ei ipêk hrang a ni.

¹⁷ Tu’n mani rammual irchon neiin a urêng irsam hmu sianlân, ama kha inren no sianlân, Pathian lungthungna kha itin mo a kuang a iom thei hrang?

¹⁸ Nâihaio, chongbâi le hmûr vaiin lungthung no ih, lungthungna diktak le sinthoa inlangin ni ual ri se.

Pathian makunga hâina

¹⁹ Khanchu, thutaka ei om tih inhria ei ta, a makunga khom ngam takin om thei ei ti.

²⁰ Ei milung luan thiamno a nin changtirin te, Pathian kha ei milung nêkin a roiinpui uala, itinrêng an hriat zit a nih ti ei inhriata.

²¹ Inditom takhaio, ei lungrîlin thiamno a nin changtir no’n chu Pathian ei hnôl ngam ngai.

²² A thupêkhai ei zôma, a nuamlam ei tho sikin a kuang ei ngên murdi ei hmu thiai ngai a ni.

²³ A thupêk chu hi hi a ni: A Nâipa Jisua Krista irhming ei iama, thu a ni ipêk anga lung ei irthungirhlôm hi.

²⁴ Pathian thupêk zômtu chu Pathiana a om maia, Pathian khom a kuang a iom mai a ni. Khan, hi hi Pathian einia a om mai tih ei inhriatna a ni: Irtha a ni ipêk hi a ni.