1 TIMOTHEA toc2 1 TIMOTHEA 5 - PATHIAN LEKHABU IRTHIANG C.L. Bible (BSI)

Mi dang chunga tho hrang

¹ Upa ualhai chu ngo no’n lân, mâni pa anga enin a ngênin ngên roh; ruathartehai chu sangpa angin,

² Pitarhai chu nu angin, dôngmatehai chu irthiang takin farnu angin enhai roh.

³ Mâni ringota om meithâihai chu inza’n lân;

⁴ khannisianlân, tu le nâi nei meithâihai khan in sûngkua tianga an sintum, Pathianin sûngkua mophurna a ipêk chu hlen suak irchu sianlân, anni infa inliantu kha infa nôk ri se, kha kha Pathian nuamlam a ni.

⁵ Infâtu neiloi, mâni ringota om meithâi chu, Pathian vai irhnêl hrang a neia, changpuina zongin a sûn a zân a chongchai ngai.

⁶ Meithâi rêlillek tak chu, a hring lai khomin mithi a ini chian a ni.

⁷ Hi irkaihruaina hi hrilin lân, sêlna boiin om ri se.

⁸ Khannisianlân, tukhomin mâni in tiang le khuahai, a bîkin mâni in sûng mihai a donsui no’n chu a iamna kha a hnôla, iamloi mi nêkin an sual ual a ni.

^9-10 Kum sômruk la kâiloi chu meithâi laia irziak sa no roh; pasal inkhat vai nei, thil sa thôna lama inpâk ruk, nâi le te hong enkol inchuk tâk, mikhualhai lei intung ngai, mi irthianghai ke lei irsûk ngai, mi dengintheihai changpui nuam, thil sa thôna lama irpe mi a ini hrang a ni.

¹¹ Meithâi la nâiinpang ualhai chu irziak no roh, an irzukna sikin Krista irheisana pasal nei an nuam nôk ngai,

¹² an thu lei inkung tâk kha an porinchena sikin hrilsiat an hlo ngai.

¹³ Kha ni loi khom, mi ina an chainaa thaboi an irchua, thaboi vai khom ni loiin mi nuiso an uara, bâto an hrâta, an insîr loi hrang hrang an insîr ngai a ni.

¹⁴ Khasikin meithâi la nâiinpang ualhai chu pasal nei nôkhai sianlân, nâi neiin in sûngkua enkolhai sianlân, râlhaiin ni hrilsiatna hrang zel an inei loi hrang a ni.

¹⁵ Senkhat chu Setana zuiin an ipêt inchâi tâk a ni.

¹⁶ Iamtu nupangin, an in sûngkua meithâi ompui nei sianlân, a infa hrang a ni; Koiindang kha puakrik inpêl no ri se, meithâi an bing doka omhai khan an enkol theina hrangin.

¹⁷ Koiindang Upa, mi hruai thiam, thuhril le irchutirna tianga takirtâi bîkhai chu a bâk inhnia chôiindôm inruk an ni.

¹⁸ Lekha Thu’n, “Sehrâtpa’n bu a chîl laiin a hmûr khit no ri se; sinthotu chu a hlo hmu rua a ni,” a tia.

¹⁹ Koiindang upa an ihnôlna chu thun hretu inhni mani, inthum mani lua an om no’n chu, pom no roh.

²⁰ Thil tho’nsualhai chu vântâng makunga halirchu roh, mi dang khomin an chi theina hrangin.

²¹ Hi thu hi ite theibîkna nei loiin, ni sin thôna tina tûte thop bîk nei loia, Pathian le Krista Jisua le vântîrtôn inthanghai mithmu’n zôm hrangin sathnem irngai takin nang kin hriattir.

²² Sinthotu hrang namindet irhnot no’n lân, mâni irvong irthiang roh.

²³ Tui ringot in ta no’n lân, natna ni nei sikin, ni phîng hoina hrangin uain tômte te in viat sa ngai roh.

²⁴ Mi senkhat sualna chu an lang pama, thiamno inchang thei zôi zel a ni; senkhat sualna chu sôt ian hnunga no’n chu inlang ngai mah.

²⁵ Khaang dênin thil tho’n sa chu an lang pama, inlang no khom sian, thup mai thei chu ni mah.