1 TIMOTHEA toc2 1 TIMOTHEA 1 - PATHIAN LEKHABU IRTHIANG C.L. Bible (BSI)

Chubai mûkna

¹ Keima Paula, a ni saninhringtu Pathian le ei isabei irnghatna Krista Jisua thupêk anga Krista Jisua tirtôn hin,

² iamnaa ki nâi tak tak Timothe, chubai nang ki mûk. Pa Pathian le Krista Jisua ei Rengpa kuang ata lungkhamna, za’rngaina, irngeina hai ni kuang om ri se.

Irchutirna dikloi ata irdîn hrang

³ Makedonia rama ki fe hrang laia nang ki ingên ang khan Efesi khuaa om mai hrangin nang ki ngên nôk. Mi senkhat thurin dikloi irchutir ngaihai kha khaphai ngêt roh.

⁴ Khaanga thonthu le irchibulhai sui suina kha inmatir roh, irsêlna an intamtirna mai maia, iamna sika irhriat ngai, Pathian thil tum chu, mi inhriat infeltir ual mahai.

⁵ Milung irthiang, sia le sa inhriatna irthiang le iamna dik tak ata suak lungthungna kha a hong hring ual theina hrangin hi thu hi nang ki ipêk a ni.

⁶ Senkhatin chu kha kha an pêtsana, irsêlna inlâp loi tiang an lût ta.

⁷ Dân irchutirtu ang takin an irbea, an thu’nsîr omzia le ngam taka an thil insîr ngaihai kha inhre tak tak mahai.

⁸ Dân hi a hmangna hrang taka hmang a ni’n chu a sa ti ei inhriat.

⁹ Mi dikhai chunga irlek hrang ni mah ti inhre hrang a ni. Dân ngaisak loihai le tukullian hai, Pathian ngaisak loi le porinche hai nu le pa thattu hai le mi that hai,

¹⁰ irdit uarhai le mongkohur hai, mihriam inrûk uarhai le milak hai, milak thoa mâni thurchi dikloi taka insîrhai, thurin det insîr loi lama sintho murdihai hranga siam a ni ual.

¹¹ Inpâk inruk Pathianin inpuang hranga a ni inkoltir Thurchi Sa roiinpui irkalna tianga irchutir uar hai chunga irlek hrang a ni.

Lungkhamna sika lômthu

¹² A nin hrâttirtu, iam inruka ni bêa hi sin hranga nin kungtu Krista Jisua, ei Rengpa kuang lômthu ki insîr a ni;

¹³ matona khan an insîrinsiattu, dengintheitirtu le êrotu lei ni khom inlân, iamtu la ni ma unga; inhriat loia tho ngai ki ni sikin ki chunga za ar ngai tak taka.

¹⁴ Khan ei Rengpa lungkhamna tamtak khan Krista Jisuaa iamna le lungthungna’n a ni vur insip ual ta.

¹⁵ Krista Jisua kha mi sualhai saninhring hrangin rammuala a zuang tih hi a dikin pomrua tak a nia, anni laia kei hi a sual tak ki ni.

¹⁶ Hi pa sika hin lung a ni inkham a ni, Krista Jisua khan ki chunga a tuangdiarzia an langtir masaa, atûn ata khom ama iamtu murdi’n, kumtuang hringna nei thei an ti entîrna hrang a lei ni.

¹⁷ Inlaltak kumtuanga om, thi theiloi, mita hmu theiloi, Pathian tak vai kuanga khan chôiirsângna le roiinpuina kumtuangin om ri se. Amen.

¹⁸ Ki nâipa, Timothe, hi thupêk hi nang kin koltir; deipuhaiin ni chungchâng an lei insîr kha inhre maiin lân, kha thu kha hmangin irdoina sa kha beiin lân,

¹⁹ iamna le sia le sa inhriatna irthiang vong khak roh. Mi senkhathaiin an sia le sa inhriatna an hnôla, an iamna kha a koi siat zoi ta.

²⁰ Khahai laia khan Humenaia le Alexandara khom an kopa, Pathian insîrinsiatna an mongna hrang le an irletna hrangin sep an nanga, Setana kuta ki pêk ta a ni.