Zabur 99 - Hodáay Pákén Ketáb Balochi zobáná

Áiay pádáni padagay démá sojdah kanét

¹ Hodáwand bádsháhia kant, kawm belarzátant, á, karrubiáni nyámá, wati bádsháhi tahtá neshtag, zemin belarzát.

² Sahyuná, Hodáwand mazan ent, borzén arshay Hodá, sajjahén kawmáni sará hákem.

³ Tai mazan o bákamálén námá satá kanátant, Hodáwand pák ent.

⁴ Bádsháh zóráwar ent, adli dósta bit. Taw, oo Hodá, ensáp barjáh dáshtag, sajjahén Esráilá taw hamá kár kortag ke pa adl o ensáp ant.

⁵ May Hodáwandén Hodáyá shán o shawkat dayét o áiay pádáni padagay démá parastesh kanét, ke á pák ent.

⁶ Mussá o Hárun cha hamáiay dini péshwáyán atant o Samuil ham cha hamáyán at ke Hodáwanday námesh gept. Hodáwandesh tawár kort o áiá passaw dátant.

⁷ Cha jambaray sotuná gón áyán habari kort o áyán ham hamá hokm o Sharyat barjáh dásht ke dátagati.

⁸ Oo Hodáwand, may Hodá! Taw á passaw dátant, taw pa Esráilá pahell kanókén Hodáé atay, harchont ke áyáni gonáháni sezáet ham dát.

⁹ May Hodáwandén Hodáyá shán o shawkat bedayét, áiay pákén kóhay sará áiá parastesh kanét, ke Hodáwand, may Hodá pák ent.