Zabur 97 - Hodáay Pákén Ketáb Balochi zobáná

Nur pa pahrézkárán keshaga bit

¹ Hodáwand bádsháhia kant, zemin shádehi bekanát o sajjahén tayábi sardhagár gal bátant.

² Jambar o tahári áiay chapp o chágerdá ant, adl o ensáp, áiay tahtay bonhesht o bonyád ant.

³ Ás áiay démá rawán ent o cha har némagá áiay dozhmenán éra bárt.

⁴ Áiay grók jaháná róshná kant, zemina gendit o larzit.

⁵ Hodáwanday démá kóh chó mómá ápa bant, sajjahén jahánay Hodáwanday démá.

⁶ Ásmán áiay adlay járá janant o sajjahén kawm áiay shán o shawkatá gendant.

⁷ Á sajjahén mardom sharmsára bant ke bot sojdaha kanant, hamá ke náhudagén botáni poshtá pahra bandant. Oo sajjahén “hodáyán”! Áiá sojdah kanét.

⁸ Sahyun eshkont o shádehia kant o Yahudiahay jenek gal ant cha tai dadrasiá, oo Hodáwand!

⁹ Chiá ke taw, oo borzén arshay Hodáwand, sajjahén zeminay sará mazanshán ay, taw sajjahén “hodáyáni” sará báládast ay.

¹⁰ Shomá ke Hodáwandá dósta dárét, cha badiá naprat kanét, chiá ke á Hodádóstáni zenday negahpán ent o áyán cha badkáráni dastá nejáta dant.

¹¹ Nur pa pahrézkárán keshaga bit o shádehi pa nékdelán.

¹² Oo pahrézkárán! Hodáwanday bárgáhá shádehi kanét o áiay pákén námá benázénét.