Zabur 95 - Hodáay Pákén Ketáb Balochi zobáná

Má Hodáay dastay ramag én

¹ Byáét Hodáwandá pa galé názénén, pa wati nejátay talárá pa shádehi kukkára kanén.

² Byáét pa shogrgozári áiay bárgáhá rawén, pa shádehi kukkára kanén, sawta janén o áiá satá kanén,

³ ke Hodáwand mazanshánén Hodá ent, sajjahén “hodáyáni” masterén bádsháh.

⁴ Zeminay johli hamáiay dastá ant o kóháni borzi ham hamáiayg ant.

⁵ Daryá Hodáwandayg ent ke wat addhi kortag, hoshkén zemin ham hamáiay dastán jórh kortag.

⁶ Byáét, sará jahla kanén o sojdaha kanén, wati addh kanókén Hodáwanday bárgáhá kóndhána kapén,

⁷ ke hamá may Hodá ent o má, áiay charágáhay mardom, hamáiay dastay ramag én. Drégatá shomá maróchi áiay tawár beshkotén:

⁸ “Wati delán á paymá sarkash makanét ke kawmá Meribáyá kort, ke kawmá á róchi Massahay gyábáná kort.

⁹ Ódá shomay pirénán maná chakkáset o ázmáesh kort, bell ke mani kortagén káresh distagatant.

¹⁰ Tán chel sálá cha á naslá bézár atán, gwashton: ‘É anchén mardom ant ke delesh gomráh ant o mani ráhána nazánant,’

¹¹ Gorhá man wati hezhmá sawgend wárt ke ‘é hechbar mani ásudagiá sara nabant.’”