Zabur 92 - Hodáay Pákén Ketáb Balochi zobáná

Tai wapádáriay járá janán

Pa Shabbatay róchá sawté. Zaburé.

¹ Hodáay satá kanag wassh ent o tai námay názénag, oo borzén arshay Hodá!

² Bámgwáhán tai mehr o shapán tai wapádáriay járay janag,

³ gón dahtárén tamburag o changay zémelá wassh ent.

⁴ Chiá ke taw, oo Hodáwand, maná gón wati dastay kárán shádmán kortag, tai tawsipá shádmániay sawta janán.

⁵ Oo Hodáwand! Tai kár chón mazan ant o pegr chenkadar johlánk.

⁶ Ahmaka nazánt o nádán sarpada nabit.

⁷ Harchont ke badkár chó káhá berodant o radkár besabzant, bale tán abad tabáha bant.

⁸ Bale taw, oo Hodáwand, tán abad borzén arshay Hodá ay.

⁹ Tai dozhmen, oo Hodáwand, allam gár o gomsára bant o sajjahén badkár, sheng o sháng.

¹⁰ Bale taw mani kánth, wahshién gókay kánthay paymá borz dáshtag o maná sapáén rógen per moshtag.

¹¹ Mani chammán dozhmenáni shekast distag o góshán badkáráni sarshakuniay habar eshkotag.

¹² Pahrézkár macchay paymá sabzant o Lobnánay gazzáni paymá rodant.

¹³ Á Hodáwanday lógá keshag butagant o may Hodáay bárgáhá sabzant.

^14-15 Piriá ham bar o samara dayant o pa é járay janagá tarr o tázag o sabza mánant ke Hodáwand rást o ádel ent, hamá mani talár ent o áiá hech náensápi o badi mán nést.