Zabur 91 - Hodáay Pákén Ketáb Balochi zobáná

Hodáay bánzoláni chérá panáha bay

¹ Hamá ke borzén arshay Hodáay panáhgáhá neshtag, zórákay sáhegá áráma gipt.

² Hodáwanday bárawá gwashán: “Hamá mani panáh o kalát ent, mani Hodá, ke hamáiay sará tawkala kanán.”

³ Deljam án ke hamá tará cha shekáriáni dámá rakkénit, cha koshókén wabáyán.

⁴ Á tará gón wati poth o bálán póshénit o áiay bánzoláni chérá panáha bay, áiay wapádári espar o diwálé.

⁵ Cha shapay bimmá natorsay, na cha á tirá ke róchá srapit,

⁶ na cha wabáyá ke taháriá gardit, na cha á hawpá ke némróchá béránia kárit.

⁷ Hazárán kas tai kerrá kapit, dahán hazár tai rástén némagá, bale é tabáhi tai nazziká átka nakanant.

⁸ Tahná gón wati chammáni shánk dayagá badkáráni sezáyána genday.

⁹ Agan Hodáyá wati panáh bekanay, borzén arshay Hodáyá wati menendjáh,

¹⁰ hech kazá tai sará sarzóra nabit o hech baláh tai gedánay nazziká nayayt.

¹¹ Tai bárawá préshtagán hokma kant ke tai sajjahén ráhán, tai negahpániá bekanant.

¹² Á tará wati dastáni delá dárant tán tai pád dhókéá malaggit.

¹³ Shér o máráni sará garday, rostagén shér o syahmáráni saragán pádmála kanay.

¹⁴ Hodáwanda gwashit: “Á ke maná dósta dárit áiá nejáta dayán o hamáiay posht o panáha bán ke mani námá zánt.

¹⁵ Á maná tawára kant o man passawia dayán, sakkián áiay hamráha bán, áiá nejáta dayán o ezzata bakshán.

¹⁶ Áiá cha drájén omré sérápa kanán o Hodái nejátá áiá pésha dárán.”