Zabur 90 - Hodáay Pákén Ketáb Balochi zobáná

Zaburay cháromi ketáb Zabur 90—106 May dastáni kárán barkat beday

Hodáay hezmatkár Mussáay dwá.

¹ Oo Hodáwand! Nasláni nasl taw may menendjáh butagay.

² Cha kóháni pédá bayag o zemin o jahánay addh kanagá pésar, cha azal tán abad, Hodá taw ay.

³ Ensáná padá hákay chérá baray o gwashay: “Oo ensánay chokk! Háká per tarr.”

⁴ Hazár sál pa taw chó gwastagén yak róchéá ent, chó shapi yak páséá.

⁵ Ensán wábé o chó háréá áiá rópána kanay. Sohbá chó káhá tázag ent,

⁶ sabáhá rodit o sabzit, bégáhá gimmorit o hoshka tarrit.

⁷ Cha tai hezhmá halása bén, cha tai gazabá paréshán.

⁸ Taw may mayár wati démá kortagant o chérén gonáh wati bárgáhay rozhnáiá.

⁹ May sajjahén zend tai hezhmay chérá gwazit o wati sálán pa nálagá halása kanén.

¹⁰ May omray róch haptád sál ant yá hashtád sál, agan sakk zreng bebén, bale sharterén róch ham zahmat o janjálá porr ant, sakk zutta gwazant o má bála kanén.

¹¹ Kay tai hezhmay trondiá zánt? tai gazab delá torsa nádénit.

¹² Gorhá márá é zántá beday ke may rócháni hesáb kamm ent, tán may del aglmand bebit.

¹³ Dém pa má per tarr, oo Hodáwand! Tán kadén chosha bit? Wati hezmatkáráni sará rahm kan.

¹⁴ Bámgwáhán, márá gón wati mehrá sér kan, tánke sajjahén omrá sawt bejanén o shádehi bekanén.

¹⁵ Haminchok róchá ke taw márá azáb dátag, haminchok róchá márá shádmán kan, haminchok sálá ke sakkián dochár butagén.

¹⁶ Tai kár tai hezmatkáráni démá paddar bátant o tai mazani pa áyáni óbádagán.

¹⁷ May Hodáwandén Hodáay mehrabáni pa má sar bát, may dastáni kárán barkat beday, haw, may dastáni kárán barkat beday.