Zabur 88 - Hodáay Pákén Ketáb Balochi zobáná

Róch o shap gón taw zári o peryáta kanán

Pa sázger o washáwázáni sálárá. Kórahay chokkáni Zabur. “Mahallat Léhanutay” tarzay sará. Hémán Ezráhiay shayri gwashtánk. Sawté.

¹ Oo Hodáwand! Oo mani rakkénókén Hodá! Shap o róch tai bárgáhá dwá o peryáta kanán.

² Mani dwá tai dargáhá berasát, wati delgóshá gón mani peryátá kan.

³ Man janjálán kaptagán o mani zend pa marká sar butag.

⁴ Hamá mardománi paymá hesáb áraga bán ke johlén kandhá kaptagant, anchén mardoméay paymá ke nezór o nátwán ent.

⁵ Mordagáni nyámá yalah dayag butagán, chó mordagéá ke kabrá waptag, ke taw áyáni yátá naay o cha tai dastá jetá butagant.

⁶ Taw maná johlterén kandhá dawr dátag, tahárén johlánkiá.

⁷ Tai hezhm mani chakká kaptag, chawlán maná mán patátag. Ósht...

⁸ Taw mani hamdelén sangat cha man dur bortag o cha man bézár kortagant. Bandig án o dar átka nakanán.

⁹ Mani chamm cha andóhá tahár butagant. Oo Hodáwand! Har róch tará tawára kanán o dastán pa taw shahárán.

¹⁰ Wati ajabén kárán mordagán pésha dáray? Mordagáni arwáh páda káyant o tará satá kanant? Ósht...

¹¹ Mordag, kabrá tai mehray járá janant? Mordagáni jaháná tai wapádáriay kessahána kárant?

¹² Taháriá, tai ajabén kár zánaga bant o tai adl, shamóshkáriay molká?

¹³ Bale man gón taw madatay peryátá kanán, oo Hodáwand! Hamok sabáhá mani dwá tai bárgáhá rasant.

¹⁴ Oo Hodáwand! Chiá maná yalaha kanay o wati démá cha man chéra dayay?

¹⁵ Cha warnáiá sakkiáni ámách o markig butagán, tai torsá maná bazzag kortag o béwas án.

¹⁶ Tai hezhmá maná patátag o tai bimmá maná próshtag.

¹⁷ Sajjahén róchá ápay paymá maná chapp o chágerdá geptag o cha har némagá angerresh kortag.

¹⁸ Taw mani dóst o sangat cha man dur kortagant, tahná tahári ent ke mani hamráh ent.