Zabur 85 - Hodáay Pákén Ketáb Balochi zobáná

Zenda nabakshay?

Pa sázger o washáwázáni sálárá. Kórahay chokkáni Zabur.

¹ Oo Hodáwand! Taw wati sardhagárá rahmat gwart o Ákubay gwastagén washbahti padá per tarrént.

² Taw wati kawmay mayárbári bakshetant o áyáni sajjahén gonáh póshetant. Ósht...

³ Taw wati sajjahén gazab poshtá dawr dát o wati hezhmay ás tóst.

⁴ Oo may rakkénókén Hodá! Gón má wasshán bay o wati gazabá cha má dur kan.

⁵ Tán abad gón má zahra bay? Wati hezhmá nasláni nasl drájkassha kanay?

⁶ Márá padá zenda nabakshay ke tai kawm tai bárgáhá shádehi bekant?

⁷ Oo Hodáwand! Wati mehrá márá pésh bedár o márá hamá rakkénagá bebaksh ke cha tai némagá ent.

⁸ Har chizz ke Hodáwandén Hodá gwashit, man gósha dárán, chiá ke pa wati kawmá émeniay kawlá dant, pa wati wapádárán, chó mabit ke á ahmakiay ráhá per betarrant.

⁹ Béshakk, á mardománi rakkénag nazzik ent ke cha Hodáyá torsant, tán may sardhagár cha áiay shán o shawkatá sarréch bebit.

¹⁰ Mehr o wapádári yakdegará dochára kapant, adl o émeni yakdomiá chokkant.

¹¹ Wapádári cha zeminá rodit o adl cha ásmáná jahláda chárit.

¹² Béshakk, Hodáwand nékén chizza bakshit o may zemin áiay bar o samará kárit.

¹³ Adl, áiay démá rawána bit o pa áiay gámán ráhé tayára kant.