Zabur 83 - Hodáay Pákén Ketáb Balochi zobáná

Oo Hodáwand! Bétawár mabay

Asápay Zabur. Sawté.

¹ Oo Hodá! Bétawár mabay, hámósh mabay o hoshká manend, oo Hodá!

² Bechár ke tai dozhmen che paymá gorrant o cha taw naprat kanókáni sar chón borz ent.

³ Tai kawmay helápá pa cháláki pandala sázant o tai gránkadrénáni helápá shawr o saláha kanant.

⁴ Gwashant: “Byáét gár o gomsáresha kanén ke kawmé mamánant o Esráilay nám pa yátéá ham pasht makapit.”

⁵ Pa hamdeli shawresh kortag o tai helápá ahdé bastagesh.

⁶ Edumi o Esmáili, Muábi o Hágári,

⁷ Gébáli, Ammuni o Amáliki, Pilisti o Suray nendók,

⁸ Áshuri ham gón áyán hamráh ant o pa Lutay chokkán báské butagant. Ósht...

⁹ Gón áyán hamá paymá bekan ke taw gón Midyáná kort, gón Siserá o Yábiná, Kishunay kawray kerrá,

¹⁰ ke Endórá tabáh butant o zeminay kad o samát butant.

¹¹ Esháni sardárán Óréb o Zehébay paymá kan, shahzádagánesh Zebah o Zalmunnáay dhawlá,

¹² ke gwashtagatesh: “Byáét Hodáay charágáhán pa zóra gerén.”

¹³ Oo mani Hodá! Eshán danzéay paymá bál day, chó ke paláré, gwátay démá.

¹⁴ Anchosh ke ás jangalá sóchit o kóhán mána dárit,

¹⁵ gón wati tuppánán randáesh kap o gón syahgwátán betorsénesh,

¹⁶ démáesh cha sharmá syáh kan tánke tai námay shóházá bebant, oo Hodáwand!

¹⁷ Sharmsár bát o abadi torséá kapátant, roswá bát o bemerátant.

¹⁸ Bell bezánant ke tai nám Hodáwand ent o tahná taw, oo borzén arshay Hodá, sajjahén zeminay sará hákemia kanay.