Zabur 81 - Hodáay Pákén Ketáb Balochi zobáná

Drégatá mani kawmá mani habar gósh bedáshtén

Pa sázger o washáwázáni sálárá. “Gittitay” tarzay sará. Asápay Zabur.

¹ Hodáyá pa shádehi benázénét ke may zór o wák ent, pa Ákubay Hodáyá shádmániay kukkárá borz kanét.

² Sáz o tamburagá bongéj kanét, washtawárén chang o soródán.

³ Máhay nóká, gwarándhay kánthay tawárá borz kanét, máhay chárdahá, may pákén aidá.

⁴ É pa Esráilá hokmé, rahbandé cha Ákubay Hodáay némagá.

⁵ Wahdé Mesray helápá dar átk kánuné pa Issopá eshti. Man eshkot, nááshnáén zobánéá gwasht:

⁶ “Báron cha áiay kópagá dur kort o dast cha gránén saptá ázát kortant.”

⁷ Taw sakkiáni sáhatán peryát kort o man tará rakként, man grandán andém atán o tará passaw dát, Meribáay ápáni kerrá tará chakkáseton. Ósht...

⁸ Oo mani kawm! Beshkon ke tará dháha dayán, Oo Esráil! Drégatá taw mani habar gósh bedáshtén.

⁹ Shomay nyámá darámadén hodáé mabát o bigánagén hodáéay démá sará jahl makanét.

¹⁰ Man Hodáwand án, tai Hodá ke tará cha Mesrá dar kort o áwort. Wati dapá sarjamá pach kan, ke man porria kanán.

¹¹ “Bale kawmá mani habar gósh nadásht o Esráil mani parmánbardár nabut.

¹² Gorhá man á yalah dátant ke wati sengén deláni randgiriá bekanant, wati jenday ráh o hayáláni.

¹³ Drégatá mani kawmá mani habar gósh bedáshtén o Esráil, mani ráhá beshotén.

¹⁴ Á wahdá man damáná áyáni dozhmen prósh dátagatant o mani dast áyáni dozhmenáni helápá chest butagat.

¹⁵ Hamá ke cha Hodáwandá naprata kanant, dotal o sarjahl butagatant, tán abad anchosh butagat.

¹⁶ Bale tará gehterén gandomay warákon dátagat o tará cha talárá dar kortagén bénagá séron kortagat.”