Zabur 75 - Hodáay Pákén Ketáb Balochi zobáná

Hodá ádel ent

Pa sázger o washáwázáni sálárá. “Barbád makanay” tarzay sará. Asápay Zabur. Sawté.

¹ Oo Hodá! Tai shográ gerén, tai shográ gerén ke tai nám nazzik ent o mardom tai ajabén káráni habará kanant.

² Taw gwashay: “Wati gisshéntagén wahdá pa ensáp dádrasia kanán.

³ Hamá wahdá ke zemin o áiay sajjahén nendóka larzant, é man án ke áiay pádagán mohra dárán. Ósht...

⁴ Gón porkebrán gwashán: ‘Pahr mabandét,’ o gón badkárán: ‘Wati kánthán borz makanét.

⁵ Wati kánthán enkadar borz makanét o pa kebr o gorunáki habar makanét.’”

⁶ Chiá ke sarperázi na cha ródarátká kayt, na cha rónendá o na cha gyábáná.

⁷ É Hodá ent ke dádrasia kant, yakkéá éra jant o yakkéá sarborza kant.

⁸ Chiá ke Hodáay dastá jámé, cha porjóshén sharáb o tahlagá porr ent. Sharábá réchit o zeminay sajjahén badkár áiá tán goddhi trampá warant.

⁹ Bale man modám Hodáay káráni habará kanán, Ákubay Hodáyá názénán.

¹⁰ “Sajjahén badkáráni kánthána próshán, bale pahrézkáráni kánth borz dáraga bant.”