Zabur 72 - Hodáay Pákén Ketáb Balochi zobáná

Wati adlá bádsháhá baksh

Solaymánay Zabur.

¹ Oo Hodá! Wati adlá bádsháhá bebaksh, wati ensápá bádsháhay chokká,

² tánke á pa ensáp tai kawmay sará dádrasi bekant, setam distagénáni sará pa adl.

³ Kóh pa kawmá ábádi byárátant, jomp o tomp, pahrézkáriay samará.

⁴ Bádsháh kawmay setam distagénáni hakká bedayát, mohtájáni chokkán berakkénát o setamgerán tabáh kanát.

⁵ Nasláni nasl tai sharap o ezzatá bedárátant, tánke rócha drapshit, tánke máh nura dant.

⁶ Bádsháhay hákemi hamá hawráni paymá bát ke rotagén sabzagáni sará gwárant, hamá hawráni paymá ke zeminá sérápa kanant.

⁷ Áiay ahdá pahrézkár shádáb bátant, tán hamá wahdá ke máh nura dant ábádi bát.

⁸ Daryá tán daryá áiay bádsháhi barjáh bát o cha kawrá tán zeminay goddhi simsarán.

⁹ Áiay dargáhá gyábánay nendók sará jahl bekanátant, áiay dozhmen hák bechatthátant.

¹⁰ Tarshish o tayábgwaráni sardhagáray bádsháh hamáiá song o máliát bedayátant, Shébá o Sabáay bádsháh pa áiá théki byárátant.

¹¹ Sajjahén bádsháh, áiay démá sará jahl bekanátant, sajjahén kawm áiay hezmatá bekanátant.

¹² Chiá ke á hájatmandán hamá wahdá rakkénit ke peryáta kanant, setam distagénán o hamáyán ke madatkáré néstesh.

¹³ Nezór o hájatmandáni sará rahma kant o hájatmandáni zendá rakkénit.

¹⁴ Áyáni zendá cha zolm o sheddatá nejáta dant, áyáni hóná gránkimmata zánt.

¹⁵ Omri báz bát, Sabáay teláh áiay peshkash bátant. Mardom modám áiay dwágó bátant o sajjahén róchá pa áiá barkat belóthátant.

¹⁶ Gandom sajjahén molká anchosh báz bát ke jompáni sará chawl bejant o bar o samari anchosh báz bát ke Lobnáná ent. Shahrán mardom anchosh ábád bátant ke sabzag mán dhagárán.

¹⁷ Bádsháhay nám namirán bát, tán rócha drapshit nám o tawári bemánát. Sajjahén kawm cha áiá barkat begerátant o áiá mobárak begwashátant.

¹⁸ Hodáwandén Hodáyá satá bát, Esráilay Hodáyá, ajabén káráni kanók tahná hamá ent.

¹⁹ Áiay porshawkatén námá tán abad satá bát, áiay shán o shawkat sajjahén zeminá begerát. Anchosh bát. Ámin.

²⁰ Dáude Yassiay dwá hamedá kotthant.