Zabur 70 - Hodáay Pákén Ketáb Balochi zobáná

Pa mani madatá eshtáp kan

Pa sázger o washáwázáni sálárá. Dáuday Zabur. Dazbandié.

¹ Oo Hodá! Zutt kan o maná berakkén. Oo Hodáwand! Pa mani madatá eshtáp kan.

² Á ke mani kóshay randá ant, sarjahl o sharmsár bátant, á ke mani barbádiá gala bant, pad bekenzát o roswá bátant.

³ Á ke mani sará “hah, haha” kanant, cha pashaliá poshtoká kenzátant.

⁴ Bale á ke tai shóházá ant, sajjahén tai dargáhá shádehi kanát o gal o bál bátant, á ke tai dátagén nejátesh dósta bit, modám begwashátant: “Hodáwand mazanshán ent.”

⁵ Bale man setam distagén mohtájé án. Oo Hodá! Dém pa man eshtáp kan, taw mani rakkénók o madatkár ay. Oo Hodáwand! Dér makan.