Zabur 66 - Hodáay Pákén Ketáb Balochi zobáná

Tai kár bákamál ant

Pa sázger o washáwázáni sálárá. Sawté. Zaburé.

¹ Oo zeminay sajjahén mardomán! Pa Hodáyá shádehiay gwánká bejanét.

² Áiay námay mazaniá názénét o áiay shán o shawkatá satá kanét.

³ Hodáyá begwashét: “Tai kár chenkadar bákamál ant. Tai wák o kodratay mazaniay sawabá dozhmen tai démá háká kapant.

⁴ Zeminay sajjahén mardom tará sojdaha kanant o tará názénant. Haw! Tai námá sárháyant.” Ósht...

⁵ Byáét o bechárét ke Hodáyá ché kortag, ajabén kár pa bani ádamá.

⁶ Daryái hoshk kort o Hodáay kawm ódá pád payádaká cha kawrá gwast, áiay bárgáhá shádmáni bekanén.

⁷ Á gón wati kodratá tán abad bádsháhia kant, chammi gón kawmán ent. Sarkesh áiay helápá pád mayáyant. Ósht...

⁸ Oo kawmán! May Hodáyá satá kanét, pa borztawári benázénéti.

⁹ May zendi rakkéntag o pádi cha thagalagá dáshtagant.

¹⁰ Oo Hodá! Chiá ke taw márá chakkásetag, taw márá nograhay paymá palgártag.

¹¹ Taw márá dámá dawr dátag o may gardená mazanén báré eshtag.

¹² Cha tai razáyá mardomán márá sarjamiá lagatmál kortag, cha áp o ásá gwastagén, bale márá sarsabzén jáhéá áwortaget.

¹³ Gón sóchagi korbánigán tai dargáhá káyán o gón taw wati kawlán puraha kanán,

¹⁴ hamá kawl ke lonthán wádah dátag o dapá gwashtagant sakki o sóriáni wahdá.

¹⁵ Pazzórén dalwatán sóchagi korbániga kanán, gón gwarándháni korbánigay duttán, pa taw pas o gók nadra kanán. Ósht...

¹⁶ Oo sajjahén Hodátorsán! Byáét o beshkonét, hamá chizzána gwashán ke pa man kortaganti.

¹⁷ Gón wati dapá áiay kerrá peryáton kortag, áiay satá o saná mani zobáná at.

¹⁸ Agan badié mani delá butén Hodáwandá mani habar gósh nadáshtagat.

¹⁹ Bale Hodáyá pa rásti eshkotag o mani dwáay tawári gósh dáshtag.

²⁰ Hodáyá satá bát ke cha mani dwáyá nádelgósh nabutag o wati mehri cha man dur nadáshtag.