Zabur 65 - Hodáay Pákén Ketáb Balochi zobáná

Hodáay kawr sarréch ent

Pa sázger o washáwázáni sálárá. Dáuday Zabur. Sawté.

¹ Oo Hodá! Sahyuná satá o saná tai wadárá ent, gón taw may kawl puraha bant.

² Oo taw ke dwáyána eshkonay! Sajjahén mardom dém pa taw káyant.

³ Á wahdá ke gonáh mani sará lombetant, taw márá bakshet.

⁴ Bahtáwar hamá ent ke tawi gechéna kanay o wati bárgáhá káray tánke hamódá jahmenend bebit. Cha tai dargáhay nékiá séráp bátén, cha tai parasteshgáhay pákiá.

⁵ Gón wati bákamálén kárán, márá pa adl o ensáp passawa dayay. Oo may rakkénókén Hodá! Zeminay chár kondh o durdastterén daryáyáni omét gón taw ent.

⁶ Taw ay ke gón wati zór o wáká kóhet jórhéntagant o watá gón kodratá selahbandet kortag,

⁷ daryáyáni gorraget árám kortant, mawjáni tawár o kawmáni áshóp.

⁸ Zeminay chár kondhá nendók cha tai neshánián hayrán ant, taw shagreb o magrebá parmáay ke shádmániay kukkárá bekanant.

⁹ Taw zeminay hayáldáriá kanay, áiá ápa dayay o ábáda kanay. Hodáay kawr sarréch ent taw mardomán gandoma bakshay chiá ke tai shawr hamé butag.

¹⁰ Taw zeminay palán ápa dayay o dhagárá hamdasta kanay, gón gwáragá narmia kanay o rost o rodómá barkata dayay.

¹¹ Gón wati nékiá sálá tájé sará dayay, tai pádráh ham cha barkatá sarréch ant.

¹² Gyábánáni charágáh ábáda bant o kóhán wati srén pa shádmáni bastagant.

¹³ Dhagárán watá gón ramagán póshéntag o daragán gón gandomá, shádmániay kukkárá borza kanant o sawta janant.