Zabur 64 - Hodáay Pákén Ketáb Balochi zobáná

Maná cha badkárán chér day

Pa sázger o washáwázáni sálárá. Dáuday Zabur.

¹ Oo Hodá! Wahdé nálán o peryáta kanán, mani tawárá beshkon o zendá cha torsnákén dozhmenán berakkén.

² Maná cha badkáráni pandalán chér day, cha radkáráni áshópá.

³ Chiá ke wati zobáná zahmáni paymá téza kanant o wati tahlén habarán tiray paymá kára bandant

⁴ tánke cha wati sangarán bémayárá neshánag bekanant. Anágat o bé torsá áiá tira janant.

⁵ Radén kárá yakdomiá delbaddhia dayant, habar ke kanant, maksadesh wati dámáni chér kanag ent. Gwashant: “Kayesha gendit?”

⁶ Náensápiá dalil o honara kanant o gwashant: “Má tamán o kamálén shawré kortag.” Pa rásti ke ensánay del o hayál zánaga nabant.

⁷ Bale Hodá áyán tira jant o anágat thappiga bant.

⁸ Á wati jenday zobánay sawabá thagala warant. Harkas ke begenditesh pa áyán sará chandhénit.

⁹ Sajjahén bani ádama torsant, Hodáay kárá jára janant o áiay kárá pa hósh o sára chárant.

¹⁰ Pahrézkár Hodáwanday dargáhá shádehi kanát o áiay dargáhá panáh bezurát. Sajjahén nékdel pahr bekanátant.