Zabur 63 - Hodáay Pákén Ketáb Balochi zobáná

Arwáhon tai tonnig ent

Dáuday Zabur, hamá wahdá ke Yahudáay gyábáná at.

¹ Oo Hodá! Mani Hodá taw ay, gón wati sajjahén del o jáná tai shóházá án, arwáhon tai tonnig ent o jesm o jánon tai hodónák, béáp o hoshkén zeminéá.

² Tai pákén jágahá, maná tai shobén butag, tai shán o kodraton distag,

³ chiá ke tai mehr cha zendá sharter ent, mani lonth tará názénant.

⁴ Tán zendag án tará názénán o pa tai námá dastán borza kanán.

⁵ Arwáhon anchosh séra bit chó ke yakké wasshén waráké bwárt o dapon gón shádmánén lonthán tará názénit.

⁶ Wati bestaray tahá ham tará yáta kanán o shapáni pásán tai hayálá bán.

⁷ Tai bánzoláni sáhegá tará názénán, chiá ke taw mani madatkár ay.

⁸ Arwáhon gón taw bandók ent o rástén dastet mani posht o panáh.

⁹ Á ke mani koshagay pad o randá ant gár o gomsára bant o zeminay johlánkián éra rawant.

¹⁰ Zahmáni dapá tarrant o tólagáni waráka bant.

¹¹ Bale bádsháh Hodáay dargáhá shádehia kant o harkas ke gón Hodáyá sawgenda wárt pahra kant, chiá ke drógbandáni dap chopp o bandaga bit.