Zabur 62 - Hodáay Pákén Ketáb Balochi zobáná

Arwáhon Hodáay rahchár ent

Pa sázger o washáwázáni sálárá. “Yedutunay” tarzay sará. Dáuday Zabur.

¹ Mani arwáh pa émeni tahná Hodáay rahchár ent, chiá ke mani rakkénag cha hamáiay némagá ent.

² Mani talár o mani rakkénók tahná hamá ent, mani kalát ent, hechbara nalarzán.

³ Tán kadén mardéay sará orosha kanét tánke sarjamiá bekoshéti, chosh ke proshtagén diwál o kaptagén shank o pallé?

⁴ Albat pandala sázant ke áiá cha borzád sarshakun bekanant. Cha dróg bandagá lezzata barant, gón wati dapá barkata dayant, bale delay tahá nálata kanant. Ósht...

⁵ Oo mani arwáh! Pa émeni tahná Hodáay rahchár bay, chiá ke mani omét gón hamáiá ent.

⁶ Mani talár o mani rakkénók tahná hamá ent, mani kalát ent, mana nalarzán.

⁷ Mani neját o ezzat gón Hodáyá ent, hamá mani mohrén talár ent, mani panáhgáh ent.

⁸ Oo mardomán! Hodáay sará tawkal kanét o delay hálán hamáiay démá darshán kanét, Hodá may panáhgáh ent. Ósht...

⁹ Pa rásti ke ensán cha daméá géshter naent, bani ádam prébé, agan sháhémá tóresh bekanant hech naant. É sajjahén, yakjáh cha damé géshter naant.

¹⁰ Pa zolm o zórá tawkal makanét o pa dozziá omét mabandét, harchont ke shomay mál géshtera bit, pa áiá del mabandét.

¹¹ Hodáyá yak habaré gwashtag o man do eshkotag, ke zór o kodrat Hodáayg ent o

¹² mehr o rahm ham taig ent, oo Hodáwand! Taw harkasá áiay kortagén káráni hesábá, mozza dayay.