Zabur 6 - Hodáay Pákén Ketáb Balochi zobáná

Oo Hodá! Maná berakkén

Pa sázger o washáwázáni sálárá. Gón zehi o simmi sázán. “Sheminitay” tarzay sará. Dáuday Zabur.

¹ Oo Hodáwand! Maná gón wati hezhmá hakkal maday o gón wati gazabá neherr.

² Hodáwandá! Mani sará rahm kan chiá ke gimmortagán. Oo Hodáwand! Maná dráh bekan chiá ke jesm o jánon paréshán ent.

³ Arwáhon sakk békarár o jalájósh ent. Oo Hodáwand! Tán kadén? Tán kadén?

⁴ Hodáwandá! Wati démá gón man tarrén o mani sáhá berakkén, wati mehray sawabá maná neját beday.

⁵ Chiá ke mordag tará yát korta nakanant, kay ent ke cha mordagáni jaháná tai shográ begipt?

⁶ Cha nálagán dam bortagán, har shap gandalán cha gréwagá ménán o tahtá gón arsán tarra kanán.

⁷ Chammon cha bázén andóhán nezór butagant o cha bázén dozhmenán tahár.

⁸ Oo sajjahén badkárán! Cha man dur bét, chiá ke Hodáwandá mani gréwagáni tawár eshkotagant.

⁹ Hodáwandá mani peryát gósh dáshtagant, Hodáwand mani dwáyá mannit.

¹⁰ Mani sajjahén dozhmen sharmendag o sakk paréshána bant, á démá chahra dayant o pashal o sharmendaga bant.