Zabur 59 - Hodáay Pákén Ketáb Balochi zobáná

Maná cha dozhmenán berakkén

Pa sázger o washáwázáni sálárá. “Barbád makanay” tarzay sará. Dáuday shayr, hamá wahdá ke Sháulá pa Dáuday kóshá, lahtén chárug áiay lógá rawán dát.

¹ Oo mani Hodá! Maná cha dozhmenán berakkén o cha áyán ke mani helápá jáha janant, mani negahpániá bekan.

² Maná cha badkárán berakkén o cha hónigán neját beday.

³ Bechár ke che paymá pa mani kóshá kaminesh kortag. Oo Hodáwand! Zórákén mard mani helápá yakjáh butagant, maná hech gonáh o mayáré ham nést.

⁴ Man hech gonáh o mayáré nakortag, bale é angat mani sará orosh kanagá tayár ant. Pa mani komaká pád á o mani hálá bechár.

⁵ Oo Hodáwand, oo lashkaráni Hodá! Taw Esráilay Hodá ay, ágáh bay, sajjahén kawmán sezá beday o badkárén dróhókáni sará rahm makan. Ósht...

⁶ Shapá pera tarrant, kochekáni paymá gorrant o shahray chágerdá gardant.

⁷ Bechár ke cha dapá ché dara kanant, zahmesh dapá ent, gwashant: “Kass eshkonagá naent.”

⁸ Bale taw, oo Hodáwand, áyáni sará kanday, sajjahén kawmáni sará rishkanda kanay.

⁹ Oo mani wák o zór! Tai rahchár án, chiá ke taw mani kalát ay, oo Hodáwand!

¹⁰ Hodá pa man mehrabán ent o mani komaká kayt, dozhmenáni sará wati péróziá gendán.

¹¹ Oo Hodáwand ke may espar ay! Áyán makosh, chosh mabit ke mani kawm beshamóshit. Gón wati zórákiá eshán sargardán kan o ér byár.

¹² Pa wati dapay gonáh o lontháni habarán wati kebray tahá bandig bebant. Esháni nálat o drógbandiay sawabá,

¹³ eshán wati hezhmay tahá gár o gomsár kan, gár o gomsár kan ke hech pasht makapant, tán zánag bebit ke cha Ákubá beger tán zeminay har kondhá Hodá bádsháhia kant. Ósht...

¹⁴ Shapá pera tarrant, kochekáni paymá gorrant o shahray chágerdá gardant.

¹⁵ Warákay shóházá sar sar janána bant o agan sér mabant wába nakapant.

¹⁶ Bale man tai kodratay tawsipá sawt o sáza janán, sohbá tai mehray satáyá sawta janán o shádehia kanán, chiá ke taw mani borzén kalát ay o sakkiáni wahdá mani panáhgáh.

¹⁷ Oo mani wák o twán! Tará názénán. Hodá mani borzén kalát ent, mani Hodá ke gón man mehra kant.