Zabur 58 - Hodáay Pákén Ketáb Balochi zobáná

Hodá zeminay dádras ent

Pa sázger o washáwázáni sálárá. “Barbád makanay” tarzay sará. Dáuday shayr.

¹ Oo hákemán! Shomay bétawári náensápi naent? Mardománi nyámá pa ensáp dádrasia kanét?

² Enna, wati delá béadlia sázét o shomay dast zeminá petnah páda kanant.

³ Badkárán cha mátay lápá wati ráh gár dátag o cha pédáeshá gomráh o drógband ant.

⁴ Áyán zahré mán ent chosh ke máray zahrá, syahmáréay dhawlá ant ke góshi bastagant o

⁵ hech paymá wati démá pa márgeráni áwázá natarrénit, harchont ke ezm o honara kanant.

⁶ Oo Hodá! Esháni dantánán mán dapá prósh. Hodáwandá! É warnáén shéráni néshén dantánán cha boná dar kan.

⁷ Tachókén ápáni paymá gár bátant, wahdé kamána kasshant tiresh konth bátant o pad o nesháné maylátant,

⁸ halazunay paymá ke gón rawagá ápa bit o eshkand butagén chokkay paymá ke hechbar róchay rozhná nagendit.

⁹ Cha eshiá pésar ke shomay déz konthagáni ásá bemárant, tarr bebant yá hoshk, Hodáesh gár o gomsár kanát.

¹⁰ Pahrézkár, bérá ke gendit, shádehia kant, wati pádán mán badkáráni hóná shódit.

¹¹ Mardoma gwashant: “Albat ke pa pahrézkárá mozzé hast, Hodáé hast ke zeminay sará dádrasia kant.”