Zabur 57 - Hodáay Pákén Ketáb Balochi zobáná

Tai bánzoláni sáhegá panáha zurán

Pa sázger o washáwázáni sálárá. “Barbád makanay” tarzay sará. Dáuday shayr, hamá wahdá ke Dáud cha Sháulá tatk o gáréá chér but.

¹ Mani sará rahm kan. Oo Hodá! Mani sará rahm kan, chiá ke mani arwáh tai mayár o báhóth ent. Tai bánzoláni sáhegá panáha zurán, tán hamá wahdá ke é baláh berawt o begwazit.

² Borzén arshay Hodáay gwará peryáta kanán, hamá Hodá ke gonáhay bohtámá cha mana thagalénit.

³ Cha ásmáná wati komaká ráha dant, maná rakkénit o áyán ke maná lapáshant, pa hakkal adaba kant. Ósht... Hodá wati mehr o wapádáriá rawána kant.

⁴ Mani arwáh shéráni nyámá ent, ás bon dayókáni nyámá wapsán, hamá mardománi nyámá ke dantánesh tir o nayzah ant o zobánesh tézén zahm.

⁵ Oo Hodá! Ásmánáni sará bátay, tai shawkat sajjahén zeminá sheng bát.

⁶ Mani pádáni démá dámesh chér kort o arwáhon sarshakun but. Ráhay sará chátesh kótk, bale wat ódá shakun butant. Ósht...

⁷ Oo Hodá! Mani del mohr ent. Mani del mohr ent o sawt o sáza janán.

⁸ Oo mani arwáh! Ágáh bay. Oo chang o soródán! Ágáh bét. Man bámgwáhá cha wábá páda kanán.

⁹ Oo Hodáwand! Tará kawmáni nyámá satá kanán o pa taigi kabilaháni nyámá sawta janán.

¹⁰ Chiá ke tai mehr báz ent, tán arshá rasit o tai wapádári tán jambarán.

¹¹ Oo Hodá! Ásmánáni sará bátay, tai shawkat sajjahén zeminá sheng bát.