Zabur 52 - Hodáay Pákén Ketáb Balochi zobáná

Tawkal pa Hodáay mehrá

Pa sázger o washáwázáni sálárá, Dáuday shayri gwashtánk, á wahdá ke Edumi Duig, Sháulay kerrá shot o á sahig korti ke “Dáud, Ahimelekay lógá shotag.”

¹ Oo porzórén mard! Chiá badiay sará pahra kanay? Hodáay mehr dáemi ent.

² Oo prébkár! Tai zobán, tabáhi o barbádiay pandalána sázit, almásén tégéay paymá.

³ Tará badi cha nékiá dóster ent o dróg cha rástiá. Ósht...

⁴ Oo prébkárén zobán! Har bérán kanókén habará dósta dáray.

⁵ Bale Hodá tará abadia próshit. Tará chakápit o cha tai gedáná gwajit o cha zendagénáni zeminá tai risshagá kasshit. Ósht...

⁶ Pahrézkára gendit o torsit, badkáray sará kandit o gwashit:

⁷ “Haw! Esh ent á kas ke Hodái wati kalát nakort. Tawkali wati bázén mál o dawlatay sará bast o wati barbád kanagá twáná but.”

⁸ Bale man zaytunay sabzén drachkéay paymá án, ke Hodáay lógá sabza bit. Mani tawkal Hodáay mehray sará ent abad tán abad.

⁹ Pa tai kortagén kárán modám tai shográ gerán o Hodádóstáni démá pa tai námá ométwár án, chiá ke tai nám nék ent.